Kişanak ciresna ke wexto ke xizmet kenê, hesabê her kesî kenî û wina vat: “Ma wazenê şaristanê xo de cîyayî û seycinêbîyayîşan wedarne. Ma semedo ke wa papolanê nê şaristanî de cinî û camêrdî bibê yew polîtîkayan erzenê falîyet. Ma na xebate serra 1999 ra nata kenê. Xora pergalê hemserektî zî semedê seycibîyayîşê cinî û camêrdan ameyo ronayîş.”
2 projeyê muhîm
Kişanak vat ke 2 projeyê ma yê newe estî û wina dergeyî da qalîkerdişê xo: “Ma 2 projeyê muhîmî eştê dewre. Înan ra yew ronayîşê Xeta Şîdeto ke Cinîyan ra Beno û a bîne zî ronayîşê Îstasyonê Gama Ewilin a. Mîyanê şaristan beno, dewe bena, qeza bena, ferq nêkeno. Çi wext cinî raştê şîdetî ameyê eşkenê pê telefon ma bigêrê. No Îstasyon 24 saete akerde yo û xizmetê cinîyan de yo. Serê xete de 4 cinîyê zane est î. Heme zî bi perwerde yî. Kam ziwan de bibo eşkenê xizmet bidî.”
Hetê şima de ya
Kişanak qalîkerdişê xo wina peynî kerd: “Şima raştê şîdetî yenî, şima benî şahîd. Eke wina yew çî bêro meydan, lazim o şima xeta 444 79 49 bigêrî. Ma qasê yew telefon şima rê nêzdî yê. Şima tenya nîyê. Serekîya Dayîreyê Polîtîkayê Cenîyan de embazê ma semedê şima xebate kenî. Embazê ma her daîm kişta şima de yî. Ma şima ra rîca kenî. Eke wina yew çî bibo ca de ma bigêrî. Ma qasê telefonekî şima rê nêzdî yê.”
AMED