Hêrişê artêşa Tirk û çeteyanê ci ke seba dagîrkerdişê Vakur û Rojhelatê Sûrîye yenî kerdene, roja 11. de dewam kenî. Herçiqas ke adirbirnayîş ame îlankerdene zî artêşa Tirkî dewa Elokî de dêsê ke ronaybî hewanayî û bi çeteyanê xo hêrişê Serêkanîyê kerd. Şarê herême vera xo danî Serêkanîyê û seba ke Xoverdayîşê Rûmetinî de cayê xo bigîrî, ver bi bajarî şonî.
Hêrişê dagîrkerîye yê artêşa Tirk û çeteyanê ci roja 11. de bêmabên dewam kenî. Herçiqas ke mabênê Amerîka û dewleta Tirkî de pêvînayîşêk ame kerdene û dima ra ame vatene ke adirbirnayîş dewam keno zî hêrişê çeteyanê dewleta Tirkî dewam kenî.
Artêşa Tirk dewa Elokî de dêsî hewanayî û tîya ra çeteyî erşawitî bajarê Serêkanîyê. Artêşa Tirk û çeteyê ci bi tanq û topanê obusan hêrişê bajarî kena û tîya de sivîlî yenî hedefgirewtene. Çeteyê artêşa Tirkî birnîyayîşê adirî îxlal kenî û hêrişê şerwananê QSDyî kenî.
Çeteyanê dewleta Tirkî Serêkanîyê de hêrişê nêweşxaneyêkî kerd û destûr nêda ke ekîbê weşîye seba mudaxalekerdişê birîndaran şêro nêweşxane. Doktoro amerîkayij Davîd Eubanko ke mîyanê ekîbî de ca gêno, dîyar kerd ke ê hetê çeteyanê dagîrkeran ê dewleta Tirkî ra yenî astengkerdene.
Ganî wareyê hewayî bêro padayene
Xora yeno zanayene ke artêşa Tirk û çeteyanê ci roja 9. de nê nêweşxaneyî hedef girewtbî û ewja de sîlehê kîmyewî bikar ardbî. Xebatkarêkê nêweşxaneyî dîyar kerdbi ke hêrişî tena vera şervananê YPG û YPJyî de nêbenî, seba ke qir bikerî hêriş kenî. Reyna wexto ke ambulansan birîndarî kiriştêne nêweşxane, ê zî bîyî hedefê hêrişan. Xebatkaranê Weşîye ra Mary Frances Rosene daybî zanayene ke ganî teyarayê artêşa Tirkan bêrî vindarnayene û wareyê hewayî bêro padayene.
Çalakîyê do dewam bikerê
Bajar û qezayanê herêma Cizîrî ra xeylê kesî vera xo da bajarê Serêkanîyê û hewl dayî xo biresnî bajar. Bi seyan kesê ke herêmanê cîya-cîyayan yê Vakur û Rojhelatê Sûrîye de cuyenî, badê ke hêrişê dagîrkerîye yê artêşa Tirk û çeteyanê ci destpêkerd, vera xo da herême û destek danî şarê herême. Heto bîn de Şarê bajarê Til Temirî ke waştî şêrê Serêkanîyê û wayîrê xoverdayîşê Serêkanîyê bivejîyê, ameyî astengkerdene. Çalakgêran reaksîyon nîşan da û wina va: “Çalakîyê wayîrvejîyayîşê xoverdayîşî do dewam bikerê.”
Yewîya Ewropa: Wa leşkeranê xo bianco
Îdarekaranê Yewîya Ewropa zî hêrişanê artêşa Tirkî şermizar kerd û waşt ke wa dewleta Tirkî leşkeranê xo Vakur û Rojhelatê Sûrîye ra bianco. Seke yeno zanayene îdarekarê Yewîya Ewropa kombîyayîşêkî de ameyî têhet û vera dagîrkerîya dewleta Tirkî de deklarasyonêk weşêna û Tirkîya ra waşt ke wa hêrişan peynî bikero û yewîya xo tepîya bianco.
AMED