Kurdan ra jew şansê do bîn
Serokê Weqfa Kilturî yê Anatoliya yê Haci Bektaşî Welî Ercan Geçmez’î aşkere kerd ke, kurdan reyna bi deklarasyonê KCD serva pêrokîn şaran pêşniyazî kerdî. Geçmez’î ard zon ke, deklarasyon de zî ayseno ke, kurdî wazenê mesele bin banê meclîsî de çare bikerê û waşt ke pêşniyazê KCD esas bîrê giroten û niya va: “Peynîname de mesajê ‘na mesele bi herb nê, bi qiseykerdin çarebikerime‘ yena dayen. Tirkiye nêwazena babedê xorayverîn ke peynîname de ca girotî, fehm bikero. Ercan Geçmez’î vist vîrî ke deklarasyonê KCD serva tirkiye jez şans o.
Hemserokê Komeleyê Alewiyê Demokratîk yê Enqera Mûrat Işik’î zî aşkere kerd ke, peynîname de, waştenê demokratîk yê kurdan munaqaşe ra ame akerdin. Çarçoveyê hemwelatiyê zeypêyî de wayrê îtiqat û ziwanî biyayiş, goreyê nay îdareyê xoyî heqê reqê rewa yo. Işik’î vist vîrî ke peynîname de, herzewbîn waştenê alewiyan kî ca girotî û niya va: “Ma pey nê waştenan de yê û desteg danê. Xeylê meseleyî çarçoveyê ‘Şerta Îdareyê Heremî yê Awrûpa’ de êşkenê çare bivînê. Gerek îxtidar nê waştenan zey sedem-sebebê herb nêvîno. Nê waştenî dê raya piyaciwyayiş û weşiya azad akerê.
Hemserokê Komeleyê Alewiyê Demokratîk yê Enqera Mûrat Işik’î vist vîrî ke, hometa alewî fikrê xorayverîn ra xerîb niya û niya qesey kerd: “Xorayverîn û sîstemê Ocax yê alewiyan eynî çî îfade kenê. Se serrano alewiyan xo rayirberd. Eleqeyê ci bi dewlet ra çinîbi. Zerreyê alewiyan de, sîstemê xorayirberdin esto. Ebi Ocax’î, ebi Pîr’î, ebi murşîdî, no sîstem rameno. Işik’î peynî de ard zon ke, gune pêrokîn homet çimeyê ekonomîk û sosyalî ra bare bigîro.
Demokratîkbiyîna tirkiye
Serokê Komeleyê Kiltûr yê Pîr Sûltan Abdal Ganî Kaplan’î zî-kî ard zon ke deklarasyonê KCD serva pêrokîn şaran o. Kaplan’î vist vîrî ke gune sûkê rojawa, Stenbol, Enqera, Îzmîr zî nê pêşniyazan qisey bikero. Zerreyê xo de heremê xoser beno ke, bibê reynayiş-xelesnayişê tirkiye. Ganî Kaplan’î vist vîrî ke sîstemê eyalet pêrokîn cayanê dinya de estê, tirkiye de zî do bibê wesîleyê haşitî.
Serokê Komeleya Dersimijan yê Enqera Bulent Akdag’î kî hayr ant peynînameyê KCD ser û ard zon ke, pêşniyazê KCD dê tirkiye zî bikerê demokratîkbiyîn. Akdag’î vist vîrî ke deklarasyonê KCD îdareyan de ca girotişê însanan pêşniyaz keno û va, pêşniyazê ke tirkiye lete bikerê nê, tirkiye kenê jû estê.
DÎHA/WAN/ENQERA
Edalet yena ca
Serva deklarasyonê KCD, hiqûqzanan ra zî desteg ame. Azayê Desteya Navendî yê Komeleya Hiqûqzanê Mezopotamya Cemal Demîr’î dazonayen ke deklarasyonî de waştenê hiqûqî yê kurdan ca girotiyê. Demîr’î aşkere kerd ke deklarasyon serva tirkiye şans o û ard zon ke, bi nê pêşniyazan edalet do bîro ca. Demîr’î aşkere kerd ke Xoseriyê Demokratîk waştena statuyê siyasî yo.
Serokê Baroyê Wan Mûrat Tîmûr’î zî vist vîrî ke, wextê ronayişê komarî ra heta na het meseleya kurd her tim bi şîdet ameya destgiroten. Tîmûr’î ard zon ke, îxtidar bi hesabanê siyasî nezdiyê mesele bena û va, “deklarasyonê KCD dewamê Mutabeqatê Dolmabaxçe yo.