Ewropa de wexto ke yew kurd, kurdê bîn rê qisey keno yew pers keno. Vano, “No hal se beno?
Hale Kurd û Kurdîstanê se beno? Cizîr de se beno? Amed de se beno?”
Eynî pers mi rê zî yeno perskerdiş. Hem zî zaf yeno perskerdiş. Ez zî vana ke, no pers, persêk raşt nîyo.
Gereka yew vajo ke, “Ma sey şarê kurdê senî serkewnê?”
Erdogan se vano?
Vano ke, “Hetanê qiyamet biwirzo wi ma hemberê kurdan şer kenî “
No qisey yeno nê mane ke, qirkerdişê şarê kurd dewam bikero. Bîyayîşê şarê kurd înkarkerdiş dewam bikero. Dagirkerîya ser Kurdîstanê dewam bikero. Tirkkerdişê şarê kurd dewam bikero.
Şarê Kurd, na polîtîka û şerê AKP û dewleta tirk vîneno.
Hemberê na polîtîka û şerî sere xo nizm nêkeno.
Şarê Kurd zaferê cayan de îdarê xo beyan keno û vano, “Tîya ra dima ez bi xo, îdare xo kena. Ez Kurdîstanê de esker, polîs, memur, mamoste, walî û qaymeqamê tirk nêwazena. Pêronê înan dişmenê kenê”
Şarê Kurd hina keno. Dewleta Tirk zî pê tanq û topan hêrîşê bajar û dewanê kurd keno.
Komkiştişan virazena. Nêvana kal û pîr, tut û pîl yewe înan cîya nêkena. Kişena û kişena.
Dewlet Tirk a wehş şarê kurd kişena, la şarê kurd verê dewleta tirk de sere xo nizm nêkeno. Xoverdayîş ser xoverdayîş de ya. Bedel dano. Şehîdan dano.
Şarê Kurd Cizîre Botan de hina kerd. Dewleta Tirk serra 2014’î nat hêrîşê Cizîre Botan kena. Cizîre Botan zî hemberê hêrîşê dewleta tirk xoverdayîş de ya. Cizîre Botan xoverdayîşê 9 rojî de 25 şehîd dayî. Netîce de se bi? Dewleta Tirk hemberê xoverdayîşê şarê kurdê de binkewt.
Nika herkes vano, “Bijî Berxwedane Cizîre!”
Yane çi vejîyo werti. Eger şarê kurd zê Cizîre Botan xoverdayîş bikero, serbikewro.
Xora Kobanê de zî hina bi. Şarê Kurd, Kobanê de hemberê çeteyên DAÎŞ’ê T.C xoverda û serkewtişêk tarîxî viraşt.
Pêronê nê çîyan ra raştîyêk yasena. Perse, “Se beno?” perskerdiş raşt nîya. Gereka herkse nê persî bikero.
Ma senî dewleta tirk û AKP bin visnenê? Ma senî serkewnê? Ma senî Amed, Dêrsîm, Serhat, Xerzan, Riha, Semsûr azad kenî? Ma senî Kurdîstanê Azad awankenî. Ma senî bi xo, îdare xo kenî?
Wexto ke hina bîyero perskerdiş û xoverdayîş bibo, serkewtiş beno.
Ha Cizîre Botan ha serkewtiş. Wa herkes biewnê Cizîre Botan û senî serkewtiş beno wa biwîno.
Wa vajo, Ma zê Cizîre Botan xoverdayîş kenî. Ma serkewnê. Ma serkewnê.