Se beno wa bibo ma do nuştişê xeberan bidomnîy
Badê ke teşebusê derbe ra dima OHAL ame îlankerdiş, bi Qerarnameyanê Hukmê Qanûnî (KHK) ewil sazî û dezgeyê çapemenîye ameyî padayîş. Rojnamegerê tewqîfkerdeyî, sansur, sazî û dezgeyê çapemenîye yê ke yenî padayîş û sewbîna... Her roje karneya azadîya çapemenîye yê Tirkîya ser de zêde benî.
Babete ser o Rojnameger û Rexnekarê Medyaye Ragip Duranî qisey kerd û vînayîşê xo ard ziwan.
Duranî va ‘teşebusê derbe ra dima hukmat seba ke îqtîdarê xo xurt bikero, bi mehneya FETO hewl dano heme muxalîfan bêveng bikero’ û wina dewam kerd: “Wexto ke merdim KHKyê ke wextê OHALî de ameyî vetiş ra ewnîyeno, vîneno ke no proses de îxraç, tasfîye, qedexe û padayîş reyde têrî mendo. Erdogan seba ke rejîmê dîktatorîye awan bikero, tehamulê vengêko şenik yê muxalîfêkî daxî nêkeno. Çimkî rejîmo ke wazeno awan bikero, hetê huqûqî û meşrûîyetî de zaf zeyîf û seqet o. Weşanê ke eşkenî nê hetanê na dîktatorîye bivejî orte, hetê Qesre ra yenî qedexekerdiş. Herçiqas ke îqtîdarî bi hawayo zorî banka û şîrketan ra girewtişê pereyî reyde medyayêka girêdayeyê xo awan kerdo û bi no hawa yê ke vera ci de vindenî, seba xo sey tehlukeyêko gird vîneno. Rojnamegerê ke vera Erdoganî de sere nêronenî û karê xo domnenî, Erdoganî zaf eciz kenî.”
Her di donemî yewbînan ra zaf cîya yî
Duranî qiseykerdişê xo de qala çîyê ke bêrî kerdiş zî kerd û wina va: “Rojnamegerê ke heta nika qet nêameyî tepiştiş, karê înan bi raştî zî zor o. Heme çîyî ra ver piştîdayîşê embazê ke heps de yî muhîm o. Seba ke ê serbest bimanî, ganî ma meslekê xo bikerî, dozan bişopnî û nakokîyanê îdîanameyan biresnî şarî. No proses de ganî ma bi rojnamegeranê xerîban reyde mîyanê têkilî de bibî û ma piştî bidî yewbînan. Seba piştîya Rojawanî girewtişî, ganî merdim hîna zaf înan agahdar bikero. Cok ra ganî ma cemîyet û sendîkayan bi hawayo aktîf bixebetnî. Ez nê rojan de rojnamegerê ke wextê Almanyaya Nazî, Îtalyaya Mussolînî, Îspanyaya Francoyî, Portekîzê Salazarî ser o cigêrayîşan kena. Vera faşîzm û dîktatorîye de rojnamegerê xoserî welatanê bînan de senî hereket kerdî ser o vindena. Roja ma ya ewroyên de rojnamegerî kerdiş û donemê asayî de rojnamegerî kerdiş yewbînan ra zaf cîya yî. Dîktatorî yan zî demokrasî, rejîm se beno wa bibo, ma do viraştişê xebere, antişê fotografî, xêzkerdişê karîkaturî, şîrovekerdişê prosesî, viraştişê rîpelî, amadekerdişê programî û viraştişê qeyd û antişê kamera bidomnî.”
BRUKSEL - ANF
