Bado ke qezaya Beşîktaşî ya Stenbolî de teqîyayîş virazîya, mîyanê 10 rojan de 45 bajaran de vera partîyê HDP û DBPyî de bi talîmatê Wezaretîya Karê Zereyî 924 kesî ameybî tepiştiş. Nînan ra 250 kesî bajarê Riha de ameybî tepiştiş û nika Salona Sporî ya Lîseya Sabîha Ozlekî de yenî vindarnayîş.
Mîyanê nê kesê ke ameyî tepiştiş de avûkat, hemserekê şaredarîyan, îdarekarê partîye, muxtar û wendekarî zî estî. Babete ser o Îdarekarê Komeleya Heqê Merdiman ra avûkat Mîkaîl Yavuzî qisey kerd.
Heme mexdûr benî
Yavuzî va ‘Riha de 250 ra zêde kesî ameyî tepiştiş û seba ke dosya de qerarê nimiteyî esto, ma derheqê dosyayan de wayîrê zanayîşî nîyî’ û qiseykerdişê xo wina domna: “Seba 5 rojan qedexeyê pêvînayîşê avûkatî ame dayîş. Seba ke hûmara înan zêde ya, nizdîyê 200 camêrdî salona sporî de, 50 cinîyî zî Mudurîya Asayîşî de yenî vindarnayîş. Cayo ke nê kesî tede manenî, pak û germ nîyo. Tepişteyî problemê germîye cuyenî. Reyna kesê ke ameyî tepiştiş mîyan de nêweş, extîyar û sewbîna zî estî. Heme dekerdî yew ca û bi no hawa heme zî mexdur benî.”
Yavuzî qiseykerdişê xo de bale ant dergkerdişê wextê tepiştişî û wina va: “Keyeyê mîyanê nezanî û merakî de yî. No seba keyeyan îşkence yo. Derheqê tepiştişan de sereyê ma de nîşanê persî virazîyayî. Ma wazenî ke wa OHAL wedarîyo û mexdurîyetî biqedyî. 250 kesî yew şewe de ameyî tepiştiş û no zî sereyê merdimî de nîşanê persan virazeno. Seba tepiştişê hende kesan ganî verê cû tehqîqatêko gird bêro viraştiş. Nika ma dosyayan nêşkenî biveynî, no hesabpersayîşêk o? Gelo no qerar merkezî ra ameyo girewtiş.”
Persê ecêb persayî
Yavuzî dewamê qiseykerdişê xo de va ‘Nê 250 kesî bi îdîaya endamê rêxistine û propagandaya rêxistine kerdişî ra ameyî tepiştiş’ û wina dewam kerd: “Goreyê dosyayê ke ma xo bide resnayî, beşdarbîyayîşê kesan yê çalakîyêk meşrû zî bi hawayo sûc ameyo hesibîyayîş. Wexto ke ma persê ke ameyî perskerdiş ra ewnîyenî; pêro pîya 35-40 persî. Heme kesan rê eynî persî pers kerdî. Mesele persan de vanî ‘Gelo PKK rêxistinêk yê terorî yo, sempatîya şima PKK rê esto an nê, KCK kam o, sempatîya şima KCK rê esto, an nê?’ û sewbîna ameyî perskerdiş. Yeno famkerdiş ke tepiştiş goreyê sucî nêameyo kerdiş, tepiştişî ra dima goreyê tepiştişî suc gêrenî.”
Pawitiş asteng beno
Yavuzî tewr peynî va ’12 avûkatî zî mîyanê nê 250 kesan de estî’ û wina qedêna: “Buroyê avukatan de bi şikitişê beran sehnayîş ame viraştiş. Ez xebatkarê ÎHDyî ya. Derheqê avûkatan de qerarê tepiştişî nîno qebulkerdiş. Avûkatî pawitişê merdiman kenî, tepiştişê avûkatan hêrişêk heqê pawitişî rê yo. Ganî na neheqîye peynî biba.”
DÎHABER / RIHA