DENÎZ ÎKE ANF/AMED Rayberê Şarê Kurdî Abdullah Ocalan 15ê Sibata 1999î ra nata hucreyê yew kesî de maneno. Ocalan ke 27ê Temmuza 2011î ra nata nêşêno avûkatanê xo reyde pêvînayîş bikero, tewr peynî 11ê Êlula 2016î de birayê xo Mehmet Ocalanî reyde pêvînayîşêko kilm viraştbi. O tarîx ra nata Ocalanî ra ti xebere nîna girewtene. Komîteya Vernîgirewtişê Îşkenceyî ya Konseyê Ewropa (CPT) zî heta nika derheqê waştişê keye û avûkatanê Ocalanî yê hetê weşî û ewleyîya Ocalanî de çîyêk nêkerda. Babete ser o Serekê Şûbeya Amedî ya Komeleya Heqê Merdiman (ÎHD) Abdullah Zeytunî qisey kerd. Zeytunî vera tecrîdî de reaksîyon nîşan da û dîyar kerd ke ti eleqeyê tecrîdê Îmrali bi huqûq û qanûnî reyde çin o. Zeytunî dewamê qiseykerdişê xo de wina va: “11ê Êlula 2016î ra nata ti xebere Îmrali ra nîna girewtiş. Heta nika waştişê pêvînayîşî yê keye û avûkatanê ci ame red kerdene. Birêz Ocalan hepsîyêko normal nîyo, temsîlkarê aştîye û yê pîyacuyayîşî yo. Fikir û îdeolojîyê Ocalanî nê erdan de temînatê aştîye yî Wextê pêvînayîşan de 2 serrî qet gonîye nêrijîyayî.” Nizdîbîyayîşê CPTyî  teberê qanûnî de yo Zeytunî qala raporê CPTyî kerd û wina va: “CPTyî netîceyê pêvînayîşê xo yê 2016î, 2018 de aşkere kerd. CPT û dezgeyê bînî vera tecrîdo girankerde de wezîfeyê xo nêkerdî. Nizdîbîyayîşê CPTyî teberê qanûnî de yo. Ganî CPT demêko raver şêro Îmrali û pêvînayîş bikero.”