Her çiqas ke 2015 ra nata bi hawayo fermî wextê îqtîdarîya Başûrî derbaz bîyo zî, îdareyê Başûrî bi hawayo nêmeşrû îqtîdar de yo. Nika Başûrê Kurdistanî de krîzê sîyasî û yê ekonomîk esto.Nuştox Îmdat Şahînî derheqê krîzo ke Başûrê Kurdistanî de esto, ser o qisey kerd. 

Çîyêk nêkerd 

Şahînî va ‘partîyê ke Başûrê Kurdistanî de yî, seba kurdan polîtîka û stratejîyê raşt nêmeşnenî’ û qiseykerdişê xo wina domna: “Îqtîdar û partîyî bêusûlîyan reyde sîyaset kenî. No îqtîdar 25 serrî yo seba kurdan se kerdo, çîyêk zî nêkerdo. Goreyê mi nê îqtîdarî bi xo bîyî nêweşî. Çîyê ke kerdî hîna zî vîrê merdiman de yî; Şengal teslîmê DAIŞî kerdî, tîcaretê merdiman kenî, krîzê ekonomîk esto. Hende tîcaretê petrolî kenî û nêyî zî bi îdîaya xoserîye kenî. Tirkîya reyde seba 50 serran peymanê petrolî viraştî. Erjê ma yê mîyanneteweyî roşenî tirkan. No îqtîdar bi rotişê şarê xo vano ez dewlete awan kena û şarê xo xapêneno.” 

Şar înan ra eciz o 

Şahînî dewamê qiseykerdişê xo de va ‘seba derbazkerdişê krîzî pêvînayîşî yenî kerdiş, la nê pêvînayîşî zî do qîm nêkerî’ û qiseykerdişê xo rê wina dewam kerd: “No îqtîdar bi xapênayîşî şarî, rîyê xo yê rastikên nimnino. Gelo heta nika derheqê îcraatanê xo de şarî ra çîyêk vatî? Kombîyayîş û pêvînayîşê ke heta nika viraştî, heme zî têk şîyî. Sîstemêko seqet awan kerdî. Nê sîstemî şarê Başûrê Kurdistanî de ecizîyêka gird viraşto. Eke wina dewam bikero, do şarî de xirabîya ruhî bivejîyo. Yanî ma hemînan de do nêweşîya psîkolojîk bivejîya. La no wina nêşono, do teqîyayîşêk bivirazîyo. Çi pereyê înan û çi zî sîyasetê înan vernîya nê teqîyayîşî nêşkeno bigiro.”

Modelê Rojawanî

Şahînî peynîya qiseykerdişê xo de va ‘seba vejîyayîşê krîzî ra 2 rayîrî estî’ û qiseykerdişê xo wina qedêna: “Rayîro yewin, ya ma do fek xoserbîyayîşî ra veradî û hukmatê merkezî yê Îraqî ra girêdaye bimanî û yan zî Başûrê Kurdistanî de Modelê Rojawanî bidî awankerdiş. Ancax bi no hawa ma eşkenî qederê ameyoxa xo destê rahîban ra bigirî. Eke wina nêbo ê do ameyoxa ma bidî destê tirkan. Ganî Başûr 2 kantonan ra pê bêro; yew herêma Soran û ya bîn zî herêma Behdînan. Başûrê Kurdistanî do bi Modelê Rojawanî hîna bi hawayo demokratîk îdare bibo. Eke ma fikrê xo yê neteweyî aver nêbî, ma nêşkenî demokrasîya xo zî awan bikerî.” 


 ANF / KERKUK