ERSîN ÇAKSU / ANF/ DÊRAZOR
Operasyonê Hêzê Sûrîyeya Demokratîke (HSD) ke vakur û rojhelatê Sûrîye de seba azadkerdişê Hecînî yê Dêra Zorî yeno viraştene, roja 51. de dewam keno. Verfeka HSDyî Lîlwa Ebdullahe operasyonê ‘Firtineyê Cizîrî yê Hemleya Qedînayîşê Terorî ser o qisey kerde.
Ebdullahe viste vîrî ke operasyonê înan 10ê êlule de dest pêkerdo û wina va: “Hedefê hemleya ma rojhelatê Firatî ra pakkerdişê DAIŞî yo. Hemle çar baskan de dest pêkerd. Waştişê ma herêmanê Hecîn, Sûsa, Şefa, Ebû Xaser û Ebû Hesenî çeteyan ra pakkerdiş o. Heta DAIŞ temamî nê herêman ra bêro eştiş, operasyonê ma do bidomîyo.”
Ebdullahe arde ziwan ke rojanê peyênan de firtineyê qûmî ver pêrodayîşê giranî yenî cuyayene û wina domnaye: “Nê rojan de şer zaf giran o. Xeylî nuqteyan de pêrodayîşî estî. Tayî şerwanê ma şehîd kewtî û birîndarê ma zî estî. Embazê ma ke şehîd kewtî zafê înan bi xo zulmê DAIŞî antibi coka seba xelisnayîşê sivîlan û peynîya zulmê çeteyan ardişî xo feda kerdî. Hîrê rojanê peyênan de tewr tay 80 çeteyî ameyî kiştene û xeylî wesayîtê zirxinî û wesayîtê bombebarkerdeyî ameyî îmhakerdene. Hêzanê koalîsyonî zî hewayî ra dayo mewzîyanê çeteyan ro. Na hemleyanê tewr giranan ra yew a. Semedê çeteyan tîya dingo peyên o.”
Ebdullahe daye zanayene ke pakkerdişê çeteyan ra dima ê herême teslîmê îradeyê sivîlî kenî û qiseykerdişê xo wina qedênaye: “Senî ke verê cû herêmanê sey Reqa, Tebqa û Minbicî de îdareyêk ame ronayene, do tîya de zî wina bibo. HSD seba hakimîya cayêkî nêameyo ronayene.”