OZGUR PAKSOY / MA / AMED
Endamê Dîvanê Hemserekîya KCDyî Salîha Aydenîze û Musa Farîsogullari 24ê Hezîrane de Partîya Demokratîke ya Şaran (HDP) ra sey parlamenterî ameyî weçînayîş. Aydenîze û Farîsogullariyî derheqê weçînayîşî û demokratîkbîyayîşê Tirkîya de qisey kerdî.
Farîsogullariyî va ‘badê ke qerarê weçînayîşî ame girewtene, coşê 2 aşman yê şarî bendê weçînayîşî derbaz kerd’ û wina domna: “Herçiqas ke şert û mercê zext û antîdemokratîkî estbî zî şar serkewtişêko gird qezenç kerd. AKP 3 serrê peyênan de ser dişmenîya kurdan ra polîtîk domnayêne û hewl dayêne heme qezencanê kurdan çinî bikero.”
Farîsogullariyî bale ant tecrîdî ser û wina va: “Şar êdî tecrîdî ra zêdeyêr, azadîya Rayberê Şarê Kurdî Abdullah Ocalanî wazeno. Weçînayîşî ra dima şarê ma wezîfe û berpirsîyarîyêka girde eştî milê ma ser. Ewro êdî azadîya Birêz Ocalanî nêbo, nêbena. Ma do şexsê Birêz Ocalanî de heme hepsîyan azade bikerî. Kurdî êdî bêçare nîyî û eke kurdî yewîya xo awan bikerî, eşkenî problemanê xo çareser bikerî.”
Ganî tecrîd wedarîyo
Aydenîze zî dîyar kerde ke weçînayîşî şert û mercê OHALî de virazîyayî û wina va: “No proses badê ke pêvînayîşê Ocalanî reyde ameyêne kerdene birîyayî dest pêkerd. Tecrîdo ke Rayberê Şarê Kurdî Ocalanî ser o yeno domnayene, heme şaran ser o domnîyeno. Sîstemê Îmrali, dinya de ti cayan de nimuneya ci çin a. HDP bi îttîfaqê şarî bendê weçînayîşî derbaz kerd. Eke tecrîdo ke Birêz Ocalanî ser o yeno domnayene, wedarîyo, o wext Tirkîya demokratîke bena. Ma fek têkoşînî ra veranêdanî. Ma heta nika têkoşînê xo domnayo. Seba demokratîkbîyayîşê Tirkîya hêzê ma esto.”