Saray Guvena ke dayîka 3 domanan bîye, 20ê tebaxa 2017î de vînî bîybî û meyîtê aye 1ê êlule de mîyanê daristanêkî de amebî dîyayîş. Badê ke karê otopsîya cenazeye qedîya, cenaze teslîmê keyeyê Guvenî ame kerdiş.
Guvena ke do Dêrsim de bêra definkerdiş, seba aye Bîschofsheîm de merasîmêk ame organîzekerdiş. Sere de YJK-E, FEDA, Komeleya Elewîyan ya Hoctanusî, Yewîya Cinîyan ya ABHFyî, Yenî Kadin û NAV-DEM û xeylê sazî û dezgeyî beşdarê merasîmî bîyî.
Tabutê Guvene bi vilikan amebî xemilnayîş. Temsîlkara FEDAye Ayten Şîmşîre merasîm de qiseykerdişêkî kerde û wina va: “Ma do ewro cana xo Saray Guvene oxir bikerî. Ma zîhnîyetê camêrdî ke Saray Guvene qetil kerd, bi hezaran reyan lanet kenî.”
Qiseykerdişî ra dima nawitişê sînevîzyonî ame kerdiş û nuşteyanê rojaneyî yê Guvene ra nuşteyî ameyî wendiş. Merasîm de kênaya Guvene Rojîn zî wina va: “Dayîka mi zaf dejî antî, la hertim sereyê aye berz bî. Ez dayîka xo reyde îftîxar kena û ma do aye qet xo vîra nêkerî.”
Dima ra pîranê FEDAye ra Mehmet Turanî herkesî ra helalîye waşt. Waştişê helalîye ra dima cinîyan tabutê Guvene bi slogananê ‘Cinî, Cuye, Azadî’ oxir kerdî. Cenaze do ewro Pîlemurîya Dêrsimî de bêra definkerdiş.
ANF/ FRANKFURT