Hemsereka Komeleya Heqanê Merdiman Avûkate Eren Keskîne dîyayîşê beraatî yê doza Ergenekonî ser o va ‘xora ma çîyêko bîyaye nêpawitêne’ û wina domnaye: “AKP seba ke îqtîdar de bimano, dewleta xorî reyde pêkerd. Cok ra mumkin nêbi ke na doze sewbîna hewa dewam bikero.”

12ê Hezîrana 2007î de qezaya Umranîye ya Stenbolî de keyeyêk de 27 bombeyî amebî dîyayene û dima ra Doza Ergenekonî dest pêkerdbî. Na çarçewa de 274 kesî ameybî mehkemekerdene û çend reyan ceza dîyaybî înan, labelê dima ra yan Yargitayî xira kerdbî yan zî hetê îqtîdarî ra ameybî pawitene.

Tayyîp Erdogano ke o wext Serekwezîr bi, seba na doze vatbi ‘ez dozgerê na doze ya’ û peynîya peynî beraat dîyabi zafaneyê nê kesan. Tena Alparslan Arslan zî tede 4 kesî cezaya muebbetî girewtbî. Hemsereka Komeleya Heqanê Merdiman Avûkate Eren Keskîne babete ser o qisey kerde.

Keskîne va ‘ewro ser doza Ergenekonî ameye padayene’ û wina dewam kerde: “Labelê no vernîya têkoşînî de asteng nîyo. Çimkî têkoşînê ma serra 1915 ra nata seba ke sucê dewlete bivejîyo werte, dewam keno. Têkoşînê ma do dewam bikero. Seba ma çîyêk nêbedilîya. Xora ma çîyêko bîyaye nêpawitêne. Coka qerar ver ez şaş nêmenda.”

AKP dewleta xorî reyde pêkerd

Keskîne dîyar kerde ke kesê sey Mehmet Agar û Tansû Çîllere ke serranê 90î de sucê merdimîye kerdî, nika hetê AKPyî de ca gênî û wina domnaye: “Coka qerarê mehkeme ver ma şaş nêmendî. Ez têkoşîno ke tena dişmenîya AKPyî ser ro aver şono kêm vînena. No beno sebeb ke ma dewlete xo vîra bikerî. AKP şono labelê dewlete manena. Ganî ma qet xo vîra nêkerî. AKP nika seba ke îqtîdar de bimano, dewleta xorî reyde pêkerdo. Ganî merdim dewlete baş bişinasno. Çend haletê dewlete estî, tayê wextan nê haletî bedilîyenî. Wextêk teşkîlatê Gulenî estbî. Wan de 2 ciwanan nêşênayêne bêrî têhet, labelê hezar hebî keyeyê Gulenî abîbî. Çimkî nê haletê dewlete bî. Wexto ke karê ciqedîya, sewbîna haletan bikar ano.”

‘Tîya dewlete nê, Komara Şirnexî yo’

Keskîne daye zanayene ke goreyê ci doza Ergenekonî netîceyê şerê îqtîdarî yê mîyanênî de ameye akerdene û wina va: “Dima ra mabênê AKP û Cematê Gulenî xeripîya û na reye AKP nê hêzanê xorînan de pêkerd. Xora wexto ke pêkerd, doze ameye padayene. Ma ê kesê ke doze de ameyêne mehkemekerdene baş şinasnenî. Sey nimune Levent Ersoz Şirnex de wezîf kerdêne. O wext 2 îdarekarê HADEPî qereqol de ameyî vînîkerdene. Wexto ke ma şîyî Şirnex, Ersozî ma ra va; Tîya Komara Tirkîya nîyo, Komara Şirnexî yo, tîya de qala mi pere kena. Nika Ersoz beraat kerd. Nika do tazmînat bidîyo înan. Goreyê mi çîyo tewr dejin no yo.”

Ganî ma muxalîfîye bikerî

Keskîne va ‘herçiqas ke ewro qerarê beraatî bidîyo zî, sucê nê kesan eşkera bi’ û wina dewam kerd:” Alparslan Aslan tena şexs o. Eke ê ke nê wezîfe da ci, eşkera bibî, o wext rêxistine vejîyena orte. Eke ma na cografya de tayê çîyan muhakeme nêkerî, xo bi xo kerdoxê çîyêk nêvejîyeno orte. Xora kerdoxê ê sucî dewlete bi xo ya. Eke ma wina nê, tena şexsan ser ro hereket bikerî, o wext ma nêşênî netîce bigîrî. Nika dewlete tewr zaf sîyasetê Kurdan ra tersena. Çimkî HDP ra dima sîyaseto sîvîl zaf bi bihêz. Se ra 15 reyî girewtî. Goreyê mi tewr zaf no dewlete tersna. Seba ke dewlete sîyasetmedaran ra tersaye, sere de Demîrtaş û xeylê sîyasetmedarî zîndan de yî. Hakim endamê FETO, Kemalîst û nîjadperest bo zî ferq nêkeno. Wexto ke Kurd bo, qerarê hemînan eynî yo. Tena qeraranê bînan munaqeşe kenî.”

 MA / STENBOL