Dewleta Tirkî ke bi rayîr û metodanê cîya-cîyayan hêrişanê xo yê vera Vakur-Rojhelatê Sûrîye domnena, badê ke Hêzanê Sûrîyeya Demokratîke (QSD) peynîya estena çeteyanê DAÎŞî arde, giranî daye hêrişanê hucreyanê vinderteyan ser.
Hêzê QSDyî û YPGyî rojanê peyênan de Firat de operasyonêko taybet viraşt û xeylî kesê ke têkilîya înan bi îstîxbaratê Tirkî û DAÎŞî dir esta pîya bi teqemenîyan tepiştî. Endamanê çeteyan ê ke ameyî tepiştene derheqê plananê leyminan ê îstîxbaratê Tirkî û DAÎŞî de melumatê muhîmî dayî.
Îsa Ebdulfetah Hemûdo ke mengêk û nîm verî Reqqa de tepişîyabi, dîyar kerd ke o ameyo wezîfedarkerdene ke tewrê QSDyî bibo û jehr bido werdê şerwanan. Hemûdî da zanayene ke o fermanê na yewe kesê bi nameyê Ebû Helayî ke Tirkîya de yo û hemwelatijê Tirkîya yo ra girewto. Hemûdî va ‘ez serra 2016 de seba karî Idlib ser ro şîya Tirkîya û wextêk qezaya Zeytînbûrnû ya Stenbolî de xebetîyaya’ û wina domna: “Dewleta Tirkî beranê mabênê Hatay û Idlibî yê ke fermî nêyê, înan ra seba her saete 32 hezar Dolar gêna. Bi 32 hezarî dolarî qasê saetêk ber beno ê şima, şima eşkenê her çî ci ra ravêrnê.”
‘Bi kiştişê keyeyê mi ez tehdît kerda’
Hemûdî va ‘gama ke ez ûca de bîya, rojêk Ebû Hela mi gêra’ û wina domna: “Mi ra nuqteyê leşkerîyî yê tîyayî pers kerdî. Mi ra waşt ke ez şirî Reqqa û tewrê QSDyî bibî û seba ê bixebetîyî. Gama ke mi ci ra vat ez qebul nêkena, fotografê keyeyê min ê Meskene ramotî mi û ez tehdît kerda. Cok ra ez şîya Reqqa û beşdarê dewreyê QSDyî bîya. Dima ra bi rayîrê cinîyêkî tayê hebî erşawitî mi rê, labelê hîna mi nêkerdbî, ez ameya tepiştene. Ebû Hela Dera ra yo û wextêko derg o ke Anqara de yo. Ebû Hela kesêko ke xeylî dewlemend o. Nizdê otogarê Anqara de restoranêko ci yo gird yê bi nameyê Ebû Hela esto. Hatay de fîrmaya ci ya otobusan esta. Îstîxbaratê Tirkî dir xebetîno.”
ANF / REQQA