Zîndananê Kurdistan û Tirkîya de peynîya zext û îşkenceyan nîna, her ke şono nê îşkenceyî zêde benî. Nê zîndanan ra yew zî zîndanê Tîpa Myî yê Îskenderunî yo. Ame musayîş seba ke hepsîyî kurdî qisey kerdî, raştê îşkenceyî ameyî.
Hepsîyê ke aşmêk verê kurdî qisey kerdî û cezaya komînîkasyonî dîyaya înan, mektûbêk erşawitî û qala neheqîyan kerdî. Keyeyê hepsîyan zî derheqê zext û îşkenceyan de melumatê winasî dayî: “Xora hepsîyê her vîste raştê heqaretê gardîyanan yenî. Tewr peynî seba ke kurdî qisey kerdî, raştê îşkenceyî ameybî. Awa serdin ser înan ro ameya pirokerdiş û ameyî kutiş. Hepsîyê ke vera îşkenceyî de vindetî zî erzîyayî hucreyê yew kesî.”
Hepsîyê ke raporê derbî girewtî û gerre kerdî, hetê dozgerî ra raştê cewabêko ecêb ameyî. Dozgerê zîndanî hepsîyan ra wina vato: “Derheqê derbwerdişê şima de delîlêk çin o. Ez çi zana ke şima zuran nêkenî? Cok ra ez do çîyêk nêkera.” Hepsîyan zî veng dayo rayapêroyî ke wa herkes no het de hesas têbigêro.
Keyeyê 2 hepsîyan zî muracatê Şûbeya Mêrdînî ya Komeleya Heqê Merdiman (ÎHD) kerdî û hetkarîya huqûqî waştî.
ANF/BRUKSEL