AHMET KANBAL / MA/AMED
Çend rojî verê Senatoya Unîversîteya Artûklû ya Mêrdînî seba ke Enstîtuyê Ziwanê ke Cuyenî bêro padayene, qerar girewt û seba ke qerarê xo tesdîq bikero erşawit YOK rê. Vera qerarê padayîşê enstîtuyî de reaksîyonî her ke şono zêde benî. Reaksîyonan ver rektor Ahmet Agirakçayî dîyar kerdbi ke ê enstîtu nêpadenî, heme enstîtuyan binê banêkî de kom kenî.
Babete ser o Nuştox û Açarnayox Salih Agir Qoserîyo ke demêk enstîtu de ders da, qisey kerd. Qoserîyî da zanayene ke wextê prosesê çareserîye de enstîtu ameyêne fikirîyayene û wina va: “O wext seba ke nameyê ci nêbo Enstîtuyê Ziwanê Kurdî, nameyê Enstîtuyê Ziwanê ke Cuyenî ame dayene. Îqtîdaro sîyasî hewl dayêne bi no qeyde propogandaya xo bikero.”
Qoserîyî va ‘wexto ke enstîtu û beşê ci abîy, her hetê dinya ra akademîsyen û wendekarî kom bîyî’ û wina domna. “Kurdan nîşan da ke amancê înan averberdişê ziwanê xo yo. Ewja de potansîyelêko gird virazîya. Îqtîdaro sîyasî ewnîya ke nêşêno kontrol bikero, êdî bi mudaxaleyan waşt veng bikero. Wexto dî ke nêşêno wina zî bikero, na reye bi tayê mehneyan ê beşî temamî padenî.”
‘Ez nêtirawena, cayê ci bedilnena’
Qoserîyî qiseykerdişê xo de qala prosesê hewldayîşê padayîşî kerde û wina va: “Prosesê mudaxalekerdişî bi teşebusê derbe ra dima vejîyayîşê Qerarnameyanê Hukmê Qanûnî de dest pêkerd. Unîversîte de operasyonê bêûsulîye viraşt û dima ra xeylê akademîsyenî mekteb ra ameyî durîkerdene. Rektor vejîyayo vano ‘ma beş nêpadenî, sewbîna beşan reyde anî têhet’ labelê no zî maneno vatişê dizdî yê ‘ez nêtirawena cayê ci bedilnena’. Padîyayîşê enstîtuyî tesîrêko negatîf virazeno, labelê wa nêro vîrakerdene ke Kurdan bi enstîtuyî destpênêkerd. Zerrîdarê Kurdolojîyî heme cayanê dinya de xebetîyenî. Heta nika Kurdan hertim bi îmkananê xo xebatî kerdî. Wa gumanê ti kesî nêbo ke Kurdî nika ra pey hîna baş do bixebetyî.”