Roje çin a ke derheqê rojnamegeran de zext û tedayî nêbî. Xora Tirkîya hetê azadîya çapemenîye de welatanê dinya mîyan de tewr peyêne de ya. Reyna tewr zaf rojnamegerî Tirkîya de tewqîfbîyaye yî.
Tewr peynî seba ke rojnameger Bîlal Guldem û Zuhal Atlane programê xo de derheqê rewşa Rayberê Şarê Kurd Abdullah Ocalanî de persî pers kerdbî, derheqê her di rojnamegeran de tehqîqat ame akerdiş. Çarçewaya tehqîqato ke hetê Dozgerîya Komare ya Amedî de ame akerdiş de Guldem û Atlane Mudurîya Asayîşî ya Amedî de Şûbeya TEMî de îfade dayî.
Bîlal Guldem seba ke programê Rojeve de meymananê xo ra derheqê rewşa Ocalanî de persî pers kerdî, bi îdîaya ‘propogandaya rêxistine kerdene’ ra, meymananê Guldemî ra derheqê Verfekê Înîsîyatîfê Piştîdayîşê Zîndanan Mehmet Temîzyuzî de zî ‘propagandaya rêxistine kerdene’ ra tehqîqat ame kerdiş.
Derheqê Zuhal Atlana ke Platformê 1HaberVarî de Programê Mor Panorama pêşkêş kena û Hemsereka DBPyî ya Amedî Ruken Akçaye de bi îdîaya ‘Pesindayîşê suc û sucdarî’ tehqîqat abî. Rojnamegerî şîyî Mudurîya Asayîşî de îfade dayî.
Nêşênî karê ma asteng bikerî
Heto bîn ra Mudura Karê Nuşteyan yê Ajansê Xeberan Yê Dîcle (DÎHA) Dîcle Muftuogluya ke bi îdîaya ‘endamê rêxistine bîyayene’ doze ameybî akerdiş û heta 15 serran cezaya zîndanî ameyêne waştiş, qisey kerde. Muftuogluye va ‘no îdîanameyêko ecêb o û seba ma ti qîymetê ci çin o’ û wina dewam kerde: “Ajansê ma hetê hukmatê AKPyî ra bi Qerarnameyê Hukmê Qanûnî de (KHK) ame padayîş. Seba ke ma raştîyî vatî, ajansê ma ame padayîş. Embazê ma Nedîm Turfent, Zehra Dogane û Meltem Oktaye zî cok ra ceza girewtî. Ê se bikerî zî ma do karê xo ra fek veranêdî.” Mehkemeya yewine ya doze do 22ê adara 2018î de bêra dîyayîş.
NAVENDÊ XEBERAN