DENÎZ ÎKE/ANF/WAN
18 serrî ra zêdeyêr o tecrîdêko giran Rayberê Şarê Kurd Abdullah Ocalanî ser o yeno meşnayîş û bitaybetî 2 serrî yo ke ti xebere Ocalanî ra nîna girewtiş û verê cû çend hewteyî zî medyaya komelkî ser ro tayê xeberî ameybî parekerdiş.
Çend hewte yo ke kurdî û dostê kurdan payan ser de yî û heme cayanê dinya de tecrîd û yê ke tecrîd de rolê înan estî, protesto kenî. Babete ser o Hetkarê Hemserekîya HDPyî Nadîr Yildirimî qisey kerd.
Yildirimî dîyar kerd ke îqtîdarê AKP û MHPyî yan netîceyê tecrîdî hesab nêkeno yan zî ferqê nêyî de nîyo û wina va: “Ma her tim no het de înan hişyar kerd. Nêverdanî ke Tirkîya de manaya tecrîdî bêro famkerdiş. Na polîtîka de israrkerdiş, yeno manaya tehlukeyî. Ganî merdim zaf hetan ra tecrîdê Îmrali bigîro dest. Polîtîkayê teslîmgirewtişî bi xoverdayîşê Îmrali veng ra şîyî. Wexto ke polîtîkayê tasfîyeyî hetê Ocalanî ra veng ameyî vetiş, na rey hukmatî hewl da çareserî tasfîye bikero û no zî hetê hetê Ocalanî ra bi hawayo rew ame ferqkerdiş û veng ame vetiş.”
Tecrîd netîceyê zorşîyayîşî yo
Yildirimî dewamê qiseykerdişê xo de va ‘tecrîd xoverdayîşê Ocalanî reyde eleqeder o’ û wina dewam kerd: “Seba ke Ocalanî zorê nê îqtîdarî berd, cok ra tecrîd dîya destpêkerdiş. Şerê Cîhanî yo 3. ke Rojhelato Mîyanên de ame cuyayîş ver heme hêzê mîyanneteweyî zaîyatêko cîddî dayî, tena Şorişê Rojawanî yo ke bi paradîgmaya Ocalanî aver şî, serkewt. Cok ra tecrîd hetê hêzê mîyanneteweyîyan ra erzîya dewre. Tecrîd tena dewleta tirkî reyde eleqeder nîyo, lingê ci yê mîyanneteweyî zî estî. Tecrîd seba şaranê Rojhelatê Mîyanênî tehdît o. Nika ra pey zî awankerdişê şert û mercê azadî yê Ocalanî esasê têkoşînê ma yo.”
Tirkîya de krîzêko tarîxî yeno cuyayîş
Yildirimî dewamê qiseykerdişê xo de va ‘nizdîbîyayîşê CPTyî zî nîşan dano ke tecrîd tena Tirkîya reyde eleqeder nîyo’ û wina qedêna: “Cok ra ma veng danî ke wa fek polîtîkayanê dirîyan ra vera bidî û goreyê qistasanê xo hereket bikerî. Nika Tirkîya ver bi krîzî şona. Welat de bacî se ra 20 zêde bîyî. Vera cinî, doman û tebîetî de polîtîkayê dagîrkerîye dewre de yî. Heta ke Birêz Ocalan binê tecrîdî de bo, krîz çareser nêbeno.”