Rojnameger Erdogan Altanî da zanayene ke dewleta Tirkî û PDK wazenî ke tayê herêmanê Başûrê Kurdîstanî bêmerdim biverdî pîya hereket kenî û wina domna: “Cok ra bi teyarayanê şerî bombardûman kenî û heta nika bi hemkarîya PDKyî Başûr de pêro pîya 280 dewî ameyî vengkerdene.”

Artêşa Tirkî 27ê Gulane de vera Başûrê Kurdîstanî de bi nameyê Pençe de operasyonêk dabi destpêkerdene. Operasyon aye roje ra heta ewro bêmabên dewam keno. Operasyon de herêmî yenî bombardûmankerdene û sîvîlî yenî hedefgirewtene. Dewleta tirkî hewl dana herême bêmerdim biverdo.

Rojnameger Erdogan Altano ke qewimîyayîşanê herême nizdî ra taqîb keno, derheqê hêrişanê dagîrkerîye, vengkerdişê dewan û polîtîkayanê MÎTî yê Başûrê Kurdîstanî de qisey kerd. Altanî da zanayene ke esas amancê dewleta Tirkî o yo ke xeyalê ‘Mîsaki Mîllî’ yê Osmanîyan pê bîyaro.

Altanî va ‘dewleta Tirkî seba ke no plan bica bîyaro, heta nika Başûrê Kurdîstanî de 20 qerargehê leşkerî û merkezê îstîxbaratî awan kerdî’ û wina dewam kerd: “Qerargehê ke Hewlêr, Zaxo, Silêmanî, Dihok, Dîyana, Batûfa, Bamernê, Amedîye û Kanîmasî de awan bîyî de engîşta Îdareyê Herêma Kurdîstanî zî esta. Dewleta tirkî seba ke wareyanê petrolî û herême de kontrolê xo awan bikero, operasyonan virazena. Wexto ke operasyonî yenî viraştene, îdareyê herême ra ‘nê hêrişî vera PKKyî de benî û sewbîna’ yeno vatene.”

Têgêrayê MÎT û pêşmergeyanê Rojî

Altanî derheqê têgêrayîşê MÎT û pêşmergeyanê Rojî de va ‘mîyanê sînoranê Herêma Kurdîstanî de xeylê pêşmergeyanê Rojî kampa Başîka de hetê leşkeranê Tirkan ra ameyî perwerdekerdene’ û wina domna: “Nê pêşmergeyî Zaxo ra heta Berwarîya, Bamernê, Şêladizê û Soranî de ameyî bicakerdene. Endamê MÎTî seba ke îtîbarê gerîla bidî waro, çi dest ra bêro kenî. Reyna endamê MÎTî û pêşmergeyî seba ke dewan veng bikerî, şarî tehdît kenî û şarî ser o zextan kenî. PDK seba ke dagîrkerîya Tirkîya asanêr bikero, endamanê MÎTî dir têkilî de yo. Nika Hewlêr, Dihok, Zaxo û Amedîye de şûbeyê MÎTî estî. Reyna Silêmanî, Helebçe û Germîyan de endamê ci estî. Herême de 390 ra zêdeyêr şîrketê Tirkan estî û yeno zanayene ke nê şîrketî MÎT reyde xebetîyenî. YNK zî PDK ra cîyayêr nîyo. YNK bîyo 2 parçe, parçeyêk destek dano dewleta Tirkî.”

280 ra zêde dewî ameyî vengkerdene

Altanî bale ante vengkerdişê dewan ser û wina va: “Hêrişê hewayî yê artêşa Tirkî ver heta nika 280 dewî ameyî vengkerdene. Qet şik çin o ke vengkerdişê dewan de amanc o yo ke PKK û şarî yewbînan ra cîya bikerî. No semed ra hewl danî dewan bêmerdim biverdî. Amanco dîyin zî hewl danî sînorê herêma tamponî heta herêma Soranî hîra bikerî. PDK, Amerîka, hukmatê Îraqî û Îran amancanê Tirkîya ra xeberdar î, labelê seba menfîetanê xo bêveng manenî.”

Dest ser nîyayo pereyanê Barzanîyan de

Altanî qala hemkarîya PDKyî kerde û wina va: “Bêvengîya hêzanê mîyanneteweyîyan û hemkarîya PDK bingehê xo ambargoyo nimite ra gêno. Başûrê Kurdîstanî de 25ê Êlula 2017î de referandûmê xoserîye amebi viraştene û dewleta Tirkî vera Başûrî de ambargoyêk ronayo. Dewleta tirkî hewl dano ê ambargoyî bikar bîyaro. Goreyê melumatê ke herême ra ameyî girewtene, Tirkîya ambargo ra ver dest ronayo pereyanê keyeyê Barzanîyî ke Bankaya Garantî ya Tirkîya de yî ser de.”

ANHA/QAMIŞLO