Rêxistina Efû ya Mîyanneteweyî, têkildarê Sûr ke çarçoveyê ‘Vurîyayîşê şaristankî’ de yeno rijnayiş de kewt hereket. Rêxistin bi sernuşteyê “Bi seyan ronişteyê Sûrê bin rîskê vetişê bi zorî de yê" de vengê çalakîyan kerd.
Vengdayişî de vistîya vîrî ke seba ke welatijî keyeyê xo ra vejerê aw hu ceyran ser înan de ame birnayîş û heqê zerarê înan zî nîno dayîş.
Qerarê îstîmlakî ame dayîş
Rêxistina Efû hayr ant qerarê rijnayîşî ser wina va: “Wezareta Bajarvanî û Dorme bê ke bi ronişteyanê Sûrî ra dîyalog virazo û waştenanê înan ver çiman de bigîro, qerarê vetişî dayo. Ma veng danê sermîyanan ke no qerarî ra fek veradê. Kanûna 2015 û Adara 2016’î de bi hezaran malbatê Sûr bi sebebê qedexe ame koçberkerdiş.No prosesî ra dima ronişteyê taxanê Alîpaşa û Lalebey 6 aşman ra dima, ageyray keyeyanê xo. Adara 2016’î de derheqê pêrokîn qeza de qerarê îstîmlakî (milkêdewletekerdiş) ame dayîş. 16 taxê Sûr bi temamî amey îşgalkerdiş. Kanûna 2016’î de derheqê taxanê Alîpaşa û Lalebey de qerarê vengkerdişî ame dayîş. Rixmê no qerar ronişteyê Sûrî keye û taxanê xo ra nêvejyay. Rêxistina Efû bi pawitox û malbatanê Sûrî ra ronişt. Pêdîyayîşî de ronişteyanê Sûrî day zanayîş ke aşma Nîsana 2017’î de welişnayîşê taxî dest pakerdo. Seba ke welatijî tax û keyeyê xo veng bikerê ceyran û awa înan ameyê birnayîş.”
Fikrê şarî nêame girewtiş
Rêxistina Efû, dîyar kerd ke hikûmet seba no qerarî bigîro bi ronişteyanê taxî ra dîyalog nêviraşto û fikrê şarî nêgirewto û vist vîrî ke rîwalê na rewşî ê bi fikar ê. Rêxistin da zanayîş ke ronişteyê taxî mîyanê piştîdayîşê yewbînan de yê û wina dewam kerd: “Ronişteyî nêwazenê Sûr ra bivejyê û Sûr zey cayê weşîye vînenê. Goreyê qanûnanê Tirkîya û peymanê Mîyanneteweyî hikûmet nêşkena bi zorî kesî cayê ci ra goç bikero. No yew vera huqûq û standartanê mîyanneteweyî û unîversal o. Vengkerdişê bi zorî çiyekê keyfî yo û nîno qebûlkerdiş. Birnayîşê aw û ceyranî duştê huqûqî yo û îxlalkerdişê heqê mordeman û weşî yo.”
Vengdayîşê bi lezî
Rêxistina Efû ya Mîyanneteweyî veng da hikûmeta AKP û waşt goreyê prensîp û qanûnanê huqûqa mîyanneteweyî hereket bikero, bê waştena welatijan gaman nêerzo.
Rêxistine da zanayîş ke înan seba pawitişê Sûr kampanyaya îmzeyan da destpêkerdiş û ê dê nameyan Wezareta Dorme û Bajarvanîyê, ya adresê: Vekaletler Cad. No:1 Bakanliklar / Ankara, Turkey, Email: mehmet.ceylan@csb.gov.tr” ra birişê.
AMED