Festîvale seba zaf kultiran yena manaya şahî û kêfweşî, labelê Festîvala Kultur û Tebîetî ya Munzurî yena manaya ameyîşê têhet yê kesê ke 1938 de bi zorî ameybî koçkerdiş. Festîvala Dêrsimî 17 serrî yo ke bi hawayo sîstematîk ameyêne viraştiş. Labelê emser hetê qayûmî ra ameye qedexekerdiş.
Babete ser o Aktîvîsta Tevgerê Cinîyanê Demokratîkan Ozlem Armene qisey kerde. Armene va ‘qayûm ewil waşt festîvale bêmana bikero, la wexto dî ke şar qebul nêkeno, o wext festîvale qedexe kerd. Betalkerdişê festîvale yeno manaya cezakerdişê şarî.”
Festîvale têhetameyîş a
Armene dewamê qiseykerdişê xo de va ‘qayûm hetêk de 15ê Temmuze de ziqaqan de mîtîng organîze kerd, heto bîn de zî festîvale qedexe kerd’ û wina dewam kerde: “Festîvale seba dêrsimijan yena manaya têhetameyîşî. Kesê ke teber ra yenî, zîyar û mezelanê xo zîyaret kenî. Hem dersimijî û hem zî dostê dêrsimijan zaf muhîmî dayêne festîvale.”
Armene peynîya qiseykerdişê xo de wina va: “Şarê ma bi akerdişê dezgehanê şenikan xo rê ameyeyêk qezenç kerdêne. Ma festîvale de ziwan û kulturê xo îfade kenî. Na festîvale ya şarî ya û do wina zî bimana. Ez bawer kena ke roşnvîr, nuştox û sewbîna wayîrê Festîvala Dêrsimî bivejyî.”
ŞÛJIN / DÊRSIM