Seba pawitişê Şengal û wayîrvejyayîşê ci xêlê rêxistin û sazîyan ra vengdayîş ame dayen. KCK zî aşkere kerd ke iyê dê Şengal vera hêrîşanê 2. yê qirkerdişî de bipawê.
Komîteyê Karê Teber yê KCK derheqê hêrîşanê vera Şengalî de damûstayîn da aşkere kerd ke zey serra 2014î iyê dê na qorî zî Şengal bipawê. KCK vist vîrî ke hêrişê vera Şengal pêdîyayîşê Mesût Barzanî û sermîyananê dewleta Tirk ra dima amey û aşkere kerdî ke quwetê ke hêrişê Şengal kerdî bi quwetê ke 2014î de hêrişê Şengal kerdî wayrê eynî zihnîyet û hedefî de yê.
KCK da zonayen ke iyê dê pawitena Şengal bigîrê û vengê wayîrvejyayîşî day.
Avesta: Hêrişê îşgalkerdişî yo
Endama Konseya Rayverîn ê KCK Sozdar Avesta, ke tewrê televîzyonê ÇIRA bî, hayr ant pîyakarîya AKP û PDK ser û vengê seferberî da hometa Êzidîyan.
Avesta ke hêrişê vera Şengal zey konsepteke wertex biname kerd û vist vîrî ke na plan zîyareta Barzanî ya Enqere de bi Erdoganî ra pîya ameya kerdiş. Sozdar Avesta aşkere kerd ke fermana 74. ferzê şarê Êzidî kenê û wina va: “ Na hêriş, hêrişa îşgalkerdişê Êzîdxanî ya û xîyaneta tewr gird ya vera şarê kurd a. Ti meşrûyeta ENKS û PDK Şengal de çin a. Armanca nînan qirkerdişê şarê ma yo. No serrekê yo ke nê komê çete seba hêrîşî yenê perwerdekerdiş.”
Wazenê şoreşî bifetisnê
Avesta dîyar kerd ke na dewleta Tirk wazena îradeyê civaka Êzidîyan çinî bihesibno û vist vîrî ke “Herêma Xanesor yew herêma ke pêrokîn sazîyê Êzîdxanî mîyan de yê ya. Bi nê hêrîşan wazenê îradeyê Êzidîyan bişikînê.
Endama Konseya Rayverîn ê KCK Sozdar Avesta bi nê vatişan veng da hometa Êzîdî û pêrokîn şarê Kurdistanî ke bivejyê meydanan: “Na koma bi çekî hêrîşanê 3’ê Tebaxa 2014’î yê Şengal de zî ca girewt. Dima ra zî bin nameyê mexdûrîyetî de cebilxaneyê lejkerî û destegê şarî girotî. Nika bi ê tifingê ke girotî hêrişê hometa Êzîdiyan kenê. Armanca înan zelal a. Minbic de kewtî hereket, Girê Spî de amadekarîyan kenê. nika zî seba ke îradeyê Êzîdiyan bişkînê û herem de xo bi ca bikerê hêriş kenê. Bi no hewayî wazenê şoreşa Rojawa bifetisnê. Cayê înan tîya de çin o. Kamî ENKS bi çekî kerd û rişt tîya. Ganî desinde nê komî tîya ra bivejyê. Wazenê Êzidîyan tîya ra bidê goçkerdiş. Na plan 2007 ra na het rojdem de ya. 2014î de şarî qirkerdî, la şarî hardê xo terk nêkerdî û xover day.
Şengalî: No şerê xiyanetî yo
Endamê Koordînasyona Şengalî Zekî Şengalî zî derheqê hêrişanê vera Şengalî de aşkere kerd ke no şerê xiyanetî yo. Şengalî hêrişê çeteyanê PDK û dewleta Tirk zey 'şerê xiyanetî’ biname kerd û nêrazîbîyayîş damûsna.
Meclîsê Şengalî hêrişan rê nêrazîbîyayîş damûsna û aşkere kerd ke nê hewldayenî netîceyê pêkerdişê Barzanî û Erdoganî de benê.