Hepsîyo sîyasî Şeyhdavût Başkano ke Zîndanê Bunyanî yê Kayserî yê Hûmara 1î de yo, îdareyê zîndanî pîya bi 4 embazanê ey xapînayî û înan rê vato ‘ma şima benê nêweşxane’ la cayê înan bedilnayo, herinda hûmara 2î de ê hûmara 1î yê heman zîndanî de ca kerdî. Vera na neheqîye de Başkan 88 rojî yo grevê vêşanîye de yo.
Şeyhdavût Başkano ke vera tecrîdkerdişê Rayberê Şarê Kurdî Abdullah Ocalanî de kewtbi grevê vêşanî, 26ê Gulane de seba ke ey berê tedawî, sewqê Zîndanê Bunyanî yê Kayserî yê Hûmara 1î kerd. Başkanî pê rayîrê keyeyî aşkere kerd ke eke ey reyna nêerşawe nêweşxane, dest bi grevê vêşanî bikero.
Naye ra pîyê ci Şeyhmus Başkanî muracatê Komeleya Heqanê Merdimanî yê Amedî kerd. Seba ke waştişê Başkanî nêame ca, 9ê Temmuze de dest bi grevê vêşanîye kerd. Başkan seba ke ey reyna sewqê zîndano verên bikerê 88 rojî yo grevê vêşanî de yo.
Eke çîyêk bibo berpirsîyar Wezaretê Edaletî yo
Pî Şeyhmus Başkanî ajansê ANF rê qisey kerd û wina va: “Tewr peynî de 2ê Êlule de mi lajê xo reyde telefon de qisey kerd. Lajê mi se ra 44 astengdarê zîhnî yo. Ne ey tedawî kenê ne zî heqanê ey ê merdimî danê. Kamcîn suc kerdbo zî ganî bêro dermankerdene. Merdimîya winasî nêbena. Ne kitab ne zî rojname danê hepsîyan. Ne zî kontrolê weşîye kenê. Ez tim firsend nêvînena ke şêra Kayserî. Ez na bêhuqûqîye aşkere kena, bêrê piştî bidê mi. Mi bi destê xo zîndanî rê waştişname nuşt. La înan tedawî nêkerd, zîndanê ci bedelnayê. Eke çîyêk bêro sereyê lajê mi berpirsîyar Wezaretê Edaletî yo. Ez do ca nêverdî. Eke hewce bikero ez do muracatê Mehkemeya Heqanê Merdiman ê Ewropa bikerî.”
AMED