Ozdemîrî va seba ziwanê dayike û Zarok TV xoverdayiş heqê tewr heq û rewa yo. Sefer Ozdemîrî hayr ant ser qerarê girotişê Zarok TV yê MGK ser û da zonayen ke girotişê Zarok TV ser domananê kurd tesîreke xirab kerd.
Psîkologan aşkere kerdî ke girotişê Zarok TV verra domananê kurd hêrîşeke bi şîdet a û waştî ke herkes verra nayî de vindero. Psîkolog Sefer Ozdemîrî vist vîrî ke ziwanê dayike heqê tewr rewa yê domanan o û va, dewlet seba dejenerasyonî Zarok TV giroto. Ozdemîrî nayî verra haştî zey herb bi name kerd û va, ‘vernîya pêro ray û raybazanê haştî ameya giroten. No herbê şîdetî dûştê domanan o.
Vernîya nêweşîyan akeno
Ozdemîrî ard zon ke nê kerdenî dê vernîya nêweşîyanê kesayetî akerê û domanan de fobiyê civakî dê bivejyê. Psîkolog Ozdemîrî aşkere kerd ke do xêlê domanan de nêweşîya lalitî bivejyo û wina va: “Domanê ke ziwanê înan bîro qedexekerdiş, iye dê bibê domanê herbî. Do dûştê dezgehê ke ziwanê înan tomet kerdî dişmenayî akero. Iyê dê bibê hetkarê şîdetî. Do psîkolojîya xopawitenî akero. Girotişê Zarok TV dûştê domananê kurd hêrîşa tewr gird a. Dûştê nayî de xoverdayiş heqê tewr heq û rewa yo.”
Psîkolog Dogan Korkmazî zî hayr ant tesîra girotişê Zarok TV domanan ser û ard ziwan ke domanê ke bi ziwandê may de kayan temaşe nêkerê, raya vernîya ziwanê înan bîro giroten iyê dê hetê fikir û vînayişî de peyser şirê û famkerdişê ci do vêşêr giran bo. Korkmazî malbatan ra waşt ke dûştê na qedexe tekoşîn avey berê. Korkmazî aşkere kerd ke dûştê nayî de tekoşîn heqê tewr rewa yo.
DÎHA / DENÎZLÎ