Komîteyê amadekarî yê Festîvala 17. ya Xoza û Kulturî ya Mûnzûrî qedexeyê walitî rê nêrazîbîyayîş damûsna û sebebê tersê festîvalî pers kerd. Komîteyî da zanayîş ke iyê dê bi Rêxistinanê Civaka Sivîl ra bîrê têhet û dima ra qerarê xo beyan bikerê.
Walitîyê sûk Festîvala Mûnzûrî ke ame plankerdiş ke mavêna 27-30’ê Temmuze de bîro viraştiş û pêrokîn amadekarîye ci qedîyayî qedexe kerd. Komîteyê amadekarî yê Festîvale banê Platformê Şûbeyê KESK yê Dersimî de kombîyayîşeke viraşt. Serokê Komîteyê amadekar Hidir Demîrî vist vîrî ke festîvala ke înan waştî bi temaya “Festîval yê şarî ya, do yê şarî bimano, OHAL û awbendan rê nê” virazê raştê qedexeya qeyûmî amê.
’16 serrî yo virazîyena’
Demîrî aşkere kerd ke festîval roja ke seba tewrbîyayîşê çalakîyanê 15ê Temmuze de vengdayîşî amey kerdiş de qedexe bî û wina dewam kerd: “Roja 15ê Temmuze ke walîyê Tûncelî qerarê qedexeyê Festîvala 17. ya Xoza û Kulturî ya Mûnzûrî da û roja ke hemwelatijî silayîyê kuçeyan, meydanan bî, eynî rojîyê. Ganî na nakokî aqilê kesê ke wayîrê aqil û exlaqî yê de bimano. Roja ke festîvala ma qedexe bî, a roj dewlet hemwelatijan silayîyê kuçeyan kerd, mesrefê werdiş, şimitiş û resayîşî her çî bi bacê ma amey dayen. Na dewleta ke êşkena ewlehîya çalakîyanê xo bigîro, festîvala ma ke 16 serrî yo yena viraştiş û heta zerarekê nêame kesî û herzewbîn pêrokîn mesrefê festîval zî bi xo dana bi behaneyê tîvarîye qedexe kerd. La şarê Dersim do firset nêdo ke na îxtîdara ke 15 serrî yo herkesî xapînena, ci bixapîno.”
OHAL û îdareyo orfî yê 40 serran
Hidir Demîrî vist vîrî ke dewlet sebrê dewrêş û hurmetîya Dersim rê, eve bêhurmetî cewab da yo û wina dewam kerd: “Eke şarê Dersim OHAL û îdareyo orfî ke 40 serrî yo yeno ferzkerdiş û bênefes terneno rê vano bes o û eke nayî zî bi ziwan û uslûbê hunerî, bi festîvalî ano zon se, yê ke no qedexe ronayî ganî sebebê no tersî bîyarê zon. Ma qedexeyê na dewleta ke desteg nêdana şaro ke hardê xo ra ameyo goçkerdiş, bi tehdîdan sirgûnê teberê welatî bîyo festîval de bîro têlewe qebul nîkenê, şermezar kenê.” Demîrî waşt ke qerarê qedexe peyser bîro girewtiş.
Serokê Komîteyê amadekar Hidir Demîrî vist vîrî ke iyê dê bi bi Rêxistinanê Civaka Sivîl û partîyanê sîyasî ra bîrê têhet û netîceyê vînayîşê ortex qerarê xo beyan bikerê.
DERSIM