Roja Newroze, çimê ma ser Newroza Amedî bî. Ma waştene ke Newroza Amed wa zaf rind bivîyero, ma waştene ke Newroza Amed verba dewlete Tirkîya ra wa bibo sey yew cewabo ke gird. Serê sibe yê Newrozî heme kurdî kewtî rahar û şiyene wareya Newroz. Hama pîrozkerdişê Newroz dest pê nêkerdibî, yew xebere xirabin vila bî. Goreya xeberî yew lajek bi çenteyê xo verê xo da hetê Newrozî, la polîsan zî mudaxeleyê lejekî kerd û lajek kiştî. Îzehetê polisan de ame îdîakerden ke no lajek waştene ke xo wareyê Newrozî de biteqno. Hêver ma zî no rewş sey yew çalakî hesibna, ma fikirîyayene ke no hêriş pîrozbîyayişê Newroz ser o. Aye ra her kesî mesele fehmnêkerd û elbet ma zî…
Na xeber ra teber, hem Amed de û hem zî cayanê bînan ê Kurdistanê de Newroz bê hedîse viyert û her ca de şarê kurd bi coşî û bi ruhê azadîye Newroz pîroz kerd.
Labelê wexteke dima ra cewherê mesele vejîya werte. Rojnamagerê DÎHA Abdurrahman Gok caye hedîse de bî û fotografanê wexte kistişê lajekî bi (pê) makînaya xo antibî. Hêver polîsan vat bî ke “lajekî de ‘çenteyê bi bombayin’ esto û deste êy de zî kardî estbî, ma nêeşkîya ke biêdilnê, ma mecbûr bî ke lajekî bikişê.” Labelê rastî wina nêbî. Hedîse wina viyert bî. Nameyê lajekî Kemal Kurkut bi, yew ciwanê kurd bi. Kemal binê ceketê xo de tîşortê Kurdistan piragirewti bî. Polîsan tîşortê Kemalî dî û bi zorî tîşort Kemalî ra vet û xeylek zî heqeret pê kerd. Dima ra Kemal o ke ser heqaretê polîsan ra hêrs bi, xo eşt teber û yew dukanî ra kardî girewt, bi hezîn xo eşt zerre. Kemalî waştene ke xo polisan ra bipawo û waştene ke şiyero zerreyê ware. La heqaretê polîsan nêvindert û erzîye Kemalî ser, waştene ke ey bîgîrî. Kemal verba polîsan de vinert û rema. O wext zî yew polîsî pey ra gule na pa û Kemal tasîya kewt erde.
Rojnameger Abdurrahman Gokî sanîye bi sanîye wextê qetilkerdişê Kemalî antî û na cînayeta polîsan girewt bin qeydî. Saya nê fotografanê Abdurrahmanî zî, zûrê dewlete vejyay orte.
Kemal Kurkut yew wendakar bî. Seba pîrozkerdişê Newroz, Meletî ra şibi Amed. Kemal vîst û di serrî û yew ciwane kurde delalî bî. Meletî de bi keyeyê xo de ciwîyayê bî. Kemal unîversîteya Meletî de sinifê hîrêyin de beşê muzikê de bî. Keyeye êy de heme wa û birayanê ey wende bî. Kemal wexto ke panc serre bî, babî yê xo vînî kerdbî. Dadîya Kemal bi xeylek zehmetîyan ewnîyabî qicanê xo û kerdbî pîl. Keyeyê Kemalî welatperwerî û Kemal hişare xo bî kurdatîye xo tarixê xo...
Çi heyf ke şewe Newroz ma kemal kerdî vînî. Heta merdeyî Kemal raştî vecîyayebî orte. Sere siba cenazeya Kemalî, Amed ra erşawiya Meletî. Şaredarîya qezayê Battalgazî hem wesayite cenaze nêda, hem zî cayê mezel nêda, wexte şitişî de zî awe pesina. Yanî bade qetilkerdişî zî zulmê dewlete dewam kerd. Keyeyê Kemalî, bi imkananê xo ey defîn kerd. Eşkera bîyayişê fotografan ser zî walîtîyê Amedî de tehqîqat dest pêkerd, ê polîsan girewtî zerre. Labelê tehqîqat ra dima qedexeyê weşanî day. Dewlet va, “Ma hem kişenî hem zî ma nêverdanî şima raştî eşkera bikerî.” Wînî aseno ke selahîyetdarê dewlet qayilê ke na qetilkerdişî zî binimnî, sey her wext. La wina nêbeno ma penîye no qetilkerdişî nêverdanî, ma heta penî taqîb kenî, weşanenî û nusenî.
Kemalî, sey hemê qetilkerdêyî ciwanê kurd, zerreyê ma veşna. Dewlet reyna yew vilikê ma mirina. La dewlet ney hol bizano ke ciwanê kurdan nêqedîyenê. Cayê Kemal’an caye Xeyrî’yan û caye Egîd’an tim debeno û bi henzaran ciwanê kurd raharê azadîye de yî.