Vîsser derheqê ziwanê dayîkî û xebatanê xo de îzehet da û wina verdewam kerd: “Heta ke min kirmanckîye nas nêkerdbî, ziwanê dayîkî semedê min çîyo ke eceb nêbi, labelê bade min fam kerd ke ziwan semedê şarê kurd çîyo ke luks o. Ez wexto ke semedê projeya ‘Musîc Generatîons’ şîya Dêrsimî, aye wext ez muzîkê weyra ra bandor bîya. Dima zî min bire dayo ke ez bi kirmanckî muzîk biviraza.”
Azadî çîyo wina yo
Vîsser qalîkerdişê xo de dîyar kerd ke wexto ke ya Dêrsimî de bîya, ya ra ameyo vatiş ke bi ziwanê kirmanckî deyr vatişê yew cenîye her tim bandorekî gird keno û wina vat: “Raya ewil semedê ke min ziwan nêzanaynê, min deyr ezber kerdênê û wina vatênê. Serra 2014’î de min Gule Mayêraye nas kerd û ma pîya zaf rayan vecyay sehneye. Yew konserê ma de lazim bî ma fikrê xo yê ser azadîye bivatênê. Aye wext Gule vat; ‘Azadî bi ziwanê xo, xoîfadekerdiş o.’ Aye çax, aye vatiş semedê min zaf muhîm bî. Çimkî sey yew hollandayij heta aye çax min hetê xoîfadekerdişî de ti persgirêk nêantbi. Semedê min no çîyo ke zaf ecêb nêbi, labelê min dî ke no babet semedê kurdan çîyo ke zaf luks o.”
Çîyo ke bi mana nêbî
Vîsser bal ant ser ravêreyeya banderbîyîşê kirmanckîye û wina domna: “Mîyanê heman hewteye de ma pîya vecyay konserê rapî. Weyra de ciwanek bi almankî deyrê rapî vatênê, labelê qet almankî nêzanaynê reyde ma yewbînan nas kerd. Min weyra de fam kerd ke merdim bi ziwanê ke xerîb deyr bivaco, çîyo ke bi mana nîyo û min bire da ke ez kirmanckî bander biba. Ez nika zî embazanê xo yê kirmanc reyde bi kirmanckî qalî kena û bi no hawa ez hîna zî kirmanckî bander bena.”
Deyrî yenî cuyayîş
Vîsser ard ziwan ke muzîkê kurdî zaf hîsin î û qalîkerdişê xo ra wina verdewam kerd: “Semedê no hîsinbîyîşî zî dîrokî reyde eleqedar o. Deyrî zehmetîyê ke amey cuyayîş reyde pirr î. No rewş zî semedê Ewropaye çîyo ke xerîb o. Muzîkê ma ser ma de tena hetê tibî de bandor kenî, çekuyanê ci de ti peyam çino. No semedî ra goşê merdimî ra zaf çîyo ke bêmana yeno.
Ez ci ra nêqerfêna
Vîsser ciresna ke ya semedê kirmanckî bi vinîbîyayîşî reyde rî bi rî ya zaf xemgîn a û wina domna: “Kirmanckî zarawayekî ke min sero zaf bandor kena ya. Bi taybetî hîkaye û heremê ci ra ez bandor bîya. Wexto ke min kirmanckîye nas kerd ra dima çîyo ke heta aye çax min hîs nêkerdbî, ez cuyeya û no semedî ra hetê min de cayekî muhîm ya kirmanckîye esto. Kirmanckî beno sebeb ke ez teşe bida xo. Çîyek nêşkeno min kirmanckî ra biqerfno.”
Ciwanî ca gênî
Vîsser qalîkerdişê xo de bal ant ser gruba ke pîya vecyenî sehneye û wina verdewam kerd: “Ez nika Gule Mayêra reyde hedreyîya yew albumî kena. Hollandaye de ez gruba Pêro Pîya reyde vecyena sehneye û na grube ciwananê Dêrsimî ra virazyêna. Ez wazena kirmanckî sero xo aver bişêra. Ez temsîlkarê kovara bi nameyê ya ‘Perloda Ma’ ya û semedê ke na kovar bêro wendiş zî, lazim o kirmanckî bêro famkerdiş.”
Ma do wayîr bivecî
Vîsser qalîkerdişê xo de vat ziwanê dayîkî muhîm o û wina peynî kerd: “Ez bawer kena ke ciwanê kurdî do fam bikî ke zarawayê înan ya kirmanckî û kurmancî çende weş î. Rayna ez bawer kena ke ciwanê kurdî do nêy zarawayê xo ra wayîr bivecî û bander bibî. No hetî de ez hêvî kena ke nêy hewldayîşê min semedê nêy ciwanan do bibo babeta motîvekerdişî û ciwanî semedê ziwanê xo do têkoşîn bidî.”
Nadîa Vîsser kam a?
NADÎA VÎSSER 5’ê citmenge 1996 de Hollandaye de ameya dinyaye û çend serrî ra pey beşdarê koroya muzîkî bîya. Wexto ke mamostayê ya waşto ke ya vengê xo aver bîşêro, aye çax ya zî dest bi dersgirewtişê şanî kerdo. Vîsser mîyanê hewteyî de zanîngehî de beşa Turîzmî wanena, peynîya hewteye zî bi muzîkî eleqedar bena.