Dezgehê elewîyan ke Mêrsîn de kar kenî, Sempozyûmê Cinîyanê Elewîyan yê Mêrsînî yê 1. organîze kerd. Sempozyûm bi tavistişê çeraxan dest pêkerd û dima ra belgefîlmê ‘Kadinin Turkusu’ ame nîşandayene.
Sempozyûm de Hemsereka Merkezê Pêroyî yê Komeleyê Elewîyê Demokratîke Selda Guneşe, akademîsyene û nuştoxe Bedrîye Poyraze sey qiseykerdoxî beşdar bîyî. Roniştişo yewin de Sereka Polê Cinîyan yê Cemxaneyê Mêrsînî Zeynep Kaya û Îdarekara Şûbeyê Mêrsînî yê Komela Kulturî ya Pîr Sultan Abdalî Elîf Taşare zî sey qiseykerdoxî beşdar bîyî û derheqê qizilbaşî, bektaşî û elewîyê ereban de melumatî dayî. Moderatorîya sempozyûmî hetê endama Cemxaneyê Mêrsînî Şîlan Surmelîye ra ameye kerdene.
Roja dîyine de zî ser mefhûmanê can, cinî-camêrd û seyyewbînanî, pîr, dayîke, kalik, rayber, murşît, rizatîye, îqrar, musahîbî, kirîvtîye û dûştê sosyolojîkî yê cinîya elewî û ananeyê edebîyatê elewîyan ser o ame vindetene.
PÎRHA / MÊRSÎN