Qesnayoxî hema zî Şengal de sey karêko komunal û muhîm yeno dîyîş. Çend keyeyê dewa Şerkê ke peynîya fermanî hewna ameyî dewa xo, herra xo ser bi wayîrvejyayişê heywanan debara xo kenê, bi hembarî mêşna qesnenî. Welatijê bi nameyê Hesan Qasim derheqê qesnayişê mêşna de dîyar kerd ke sey welatijê dewe destpêkê aşma nîsane de dest bi qesnayişê mêşna kerdê û wina va: “Serrê verî ma eşkîyaynî peşmê înan biroşî la belê nika ma nêeşkenê bi peşmê înan debara xo bikê, nîno rotiş. Peynîya deja girde ya fermanê 73î ke serê ma de ame, ma herra xo ra fek veranêda û ma herra xo ser dewa xo de yê. Ma bi heywanê xo debara xo kenê û rizqê ma, mêşnayê ma ser o. Herra û dewa merdim heme cayêkî ra pîroz a û rûmetir a. Ez veng heme êzidîyê ke teberî de yê ra kena, biagêrî herra xo ser o.” Hewna welatij bi nameyê Qasim Silêma zî wina domna: “Karê ma karêko hembar o, ma bi hetkarîya yewbînan mêşnayê xo qesnenî. Rîyê Vîrûsê Koronayî ser o ma zehmetî ancenê, ma omidar ê ke demêko nêzd de do merdimeyî janê Vîrûsê Koronayî ra xilas bibo.” MERKEZÊ XEBERAN