Sereka Dayîreya Mîrasê Kultir û Turîzmî ya Şaredarîya Şaristano Gird Nevîn Soyukaya îzeh ard ziwan ke “Amedo Antîk” Heyeta Pêroyî ya 39’in a UNESCOyî de Lîsteya Mîrasê Dinyaye de ca girewto û wina vat: “Ez çi ra vana Amedo Antîk? Semedo ke Qeleya Amedî, Awa Anzele, beşêka Wareyê Dîcle û Baxçeyê Hewselî sey mîrasê dinyaye ameyê qebulkerdiş. Mîyanê Sûran de zî sey mintiqaya tamponî ameyo tecsîlkerdiş. Lazim o no şaristan goreyê standardê mîyannetewî, goreyê lîteraturê mîyannetewî bêro pawitiş. Erjê kultirî lazim o sey mîrasê dinyaye bêrî pawitiş.”
Taahhudê pawitişî
Soyukaya dergeyîya qalîkerdişê xo de ard ziwan ke demê endamtîya UNESCOye de înan xebatê xo çarçiwaya qanûnan de bi organîzatorîya Şaredarîya Şaristano Gird a Amedî de û Wezaretê Kultirî de ser pêşkêşê UNESCOye kerda û wina vat: “Lazim o dewlete hesabê nê çîyan baş bikero. Wexto ke endamtîya ma amey qebulkerdiş ra dima lazim bi hem dewleta Tirkiyaye û hem zî organîzasyonê herêmî hewl bidaynê ke nê mîrasê dinyaye bipawitênê. Lazim o dewlet erjanê no şaristanî bipawî. Şer û pêrodayîşan ver erjê nê şaristanî zirar vînenê.”
AMED