Qezaya Semsûr Kolik de ser Çemo ke nefesê qezayo û hewcedariyê awa qeza ano ca de, bi nameyê Karakuş projeyê HES viraziyeno. Serva viraştişê no projeyê rapora ÇED amê giroten. No projey dewanê Koçtepe, Golgelî, Bogazozu, Yolaltî û Teymenlî ra piya, do 15 dewan tesîr bikero.
Cayê tarixî bin aw de manenê
Mixtarê (keya) dewa Esendere Ramazan Erşahîn vera HES’î nêrazîbiyen damusna û da zonayen ke hetê hiqûqî îynan serpirodayişî kerdo. Erşahîn’î vist vîrî ke pêrokîn dewijî vera no projeyî yê û wina va: “Ma awa xo ya şimiten no çemî ra gênê. Hêgayanê xo no çemî ra aw kenê.”
Erşahîn’î da zonayen ke, Çemê Kolik, serva welatijanê Kolik û Semsûr zey cayê seyran o û vist vîrî ke bi viraştişê HES’î cayê tarixî, mezelxane û kişeftê tarixî yê dewa Eskeran zerar bivînê. Erşahîn’î va, ma dê destûr nêdê ke cayê xozayî yê weşiya ma û erjayê tarixê ma texrîb bibê.
Pêrokîn ganî zerar vîrenê
Ramazan Erşahîn’î aşkere kerd ke bi viraştişê projeyê HES’î ra piya ganî yê bînî zî dê zerar bivînê û wina va: Çemê Kolik rijeno Bendawê Ataturk’î miyan. Çemê Kolik de maseyî aşmanê wesarî de hakanê xo ternenê. Parka Koyê Nemrûd zî eynî sînoran de ya. Heywanê ke sînoranê Parka Nemrûdî de yê zî na aw ra şimenê.
Nefesê Kolik, cayê mihîm yê cuwyayişê welatijan
Erşahîn’î vist vîrî ke înan fam nêkerdo ke serva projeyê HES seyî destûr ameyo dayen û wina va: “Serva ke îstiqametê çemî bivûrnê dê 26 ton dînamît biteqînê. No ca, nefesê Kolik o, qadê mihîm yê cuwyanî yo.
Erşahîn’î da zonayen ke, ey ra piya 8 mixtaranê dewan serpirodayişê mahkeme kerdo. Ajansa DÎHA ke na xeber viraşt, da zonayen ke, îynan serva perskerdişê na proje sermiyananê şîrketê HES’î geyriyay la nêrasayê kesî.
DÎHA/SEMSÛR