RONÎ ARAM / ANF / STENBOL
Hemsereka Pêroyî ya HDPyî ya verêne Fîgen Yuksekdaga ke Zîndanê Kandira yê Tipa Fyî de tepişte ya, derheqê hêrişanê dagîrkerîye yê artêşa Tirkî û çeteyanê ci yê vera Vakur û Rojhelatê Sûrîye de qisey kerd.
Yuksekdage pare kerd ke polîtîkayê bingeyênî yê îqtîdarê sîyasî yê Tirkîya şer o û hêrişê dagîrkerîye yê vera Vakur û Rojhelatê Sûrîye zî na çarçewe de yê û wina va: “Beno ke xurt bibê, labelê na nêna a mana ke şima heqdar ê. Rojawan de zorbazîye û heqdarîye yewbînan de şer kenê.”
Yuksekdage dewamê qiseykerdişê xo de va ‘îqtîdarê AKPyî û lobîya şerî ke dormeyê ey de kom bîyî, hewl da ke xo bi zorbazîye sey heqdar bimojnê labelê nêeşkenê nê bikerê û wina dewam kerd: “Do nêeşkê bikerê. Herçiqas je hêzo bêpeynî yê leşkerî û sîyasî aîdê înan bibê zî, wayîrê firsendê NATO bibê zî, hêzê emperyalîstî pêroyê firsendan pêşkêşê înan bikerê zî, medya, partîyê muxalefetî piştî bidê înan zî nêeşkenê xo meşrû bimojnê.”
Yuksekdage daye zanayene êyê ke ameyî kiştene û wareyê xora bîyî şarê Rojawanî û yê herême yî û wina qedênaye: “Labelê aşkere yo ke îqtîdar bi nê şerî sernêkewt. Çimkî heqdarîye û estbîyayîşê tarîxî bi top, tifing û bombeyan nêna qezençkerdene. Heman demî de êyê ke nînan kenê, do rojêkê qetî çin bibê. AKP û dormeyê ci eke wina dewam bikerê do çin bibê. Eke pirdo tarîxî yê mabênê Kurd û Tirkan bêro rijnayene, netîceyê ci do zaf giran bibê ke qet nêeşkenê bêrê vatene.”