Çend serrî verê cû, Tayîp Erdoganî vatibi; “Ma hemberê PKK zaf hetan (eskerî, sîyasî, aborî, komalî, ruhî, çandî, diplomasî) ra şerê psîkojîk û taybet ramenî.” Dagirkerî nê qiseyanê Erdoganî de nimite nîyo. Erdogan ge ge seba dagirkerîya xo yê ser Kurdistanî eşkere qisey keno. Vano "Ma qirê kurdan anî." Qirkerdişê şarê kurd de, yew rayîr û raybazo ke yeno şuxulnayîş zî şerê psîkolojîk û zurekerîya Erdoganî û wezîranê ci yo. 

Silêman Soysuzî zî verîya çend aşman va, "Ma hetanê aşma Nîsane peynîyê PKK anî." La aşma gulane xelas bî û peynîyê PKK nêamî. Ser ra zî PKK hîna xurt bî û derbeyê giran vist artêşa tirk ro. Gerîlayê PKK çalakîyan ser çalakîyan virazênê. Wexto ke gerîlayê HPG, cayanê cîya cîya yê Kurdistanî û Koyê Tendurekî de derbeyêk giran da artêşa tirk ro, çek ser eskerê tirkan ra dawera, Silêman Soysuzî fekê xo bedilna, newe ra qiseykerd û vat: “Ma tayî derbe dawo PKK ro. Biewnê turîst senî yenî.” Silêman Soysuz vano qey ez hina qisey bikera, zurekerîya mi yena nimitiş. Ehmeqê sey Soysuzî û AKP’yîjê bînî beno ke tayî ehmeqanê AKP’yîjan bixapînê. La tesîrê qiseykerdişê înan qet ser şarê kurdî çin o. Şarê kurd gerîlayê xo zî weş şinasneno, esker û polîsê tirkî zî weş şinasneno. Wexto ke cayêk de çîyêk bibo, zano senî netîce bido. 

Meselaya vistişê helîkopterê Generalê şerê qilêrîn Aydogan Aydin de zî hina bi. Hema HPG nîvatbi ma helîkopter visto, şarê kurd vatênê, “Ma texmîn kenê ke gerîlayê ma no helîkopter visto.” Tayînan zî dua kerdênê vatênê ke,"Werrikê gerîla dazanayîş bido vajo ma no helîkopter visto.” Ez cayêk  de bî. Wexto ke TV de nuşteyê binî de ame vatiş ke "HPG helîkopterê tirk Sêgirke de ard war”, şarê ma aye ke uca de pêronê înan qîr kerd û keyf û coşêk kerd. 

La ser dazanayîşê HPG ra dewleta tirk, AKP û pêronê medyayê înan bîya kerr û lal. Yew ne qisey keno û ne zî mişewrê keno. Artêşa tirk tena verê cû vatênê, “helîkopterê ma qelîyayo telê ceyronî hina ameyo war.“ Nika o nuştê bedilno, vanî "helîkopterê ma şeq bîyo, bîyo parçe." La qey çi hina bîyo, sebeb nîşan nêdanî.  Dewleta tirk, artêşa ci û AKP eşkere bi eşkere zuran kenî. Wexto ke gerîlayanê HPG, 2008 de Şerê ZAP’î de zî helîkopterê tirk vist, o wext zî vatî "helîkopterê ma şeq bîyo." Dima ra vîdeoyê helîkopterê vejîya meydan, eşkere bi ke gerîlayan helîkopter ardo war. 

Reyna 15ê Gulane 2016’î de gerîlayanê HPG, helîkopterêk kobra yê dewleta tirk pê muşek ard war. Artêşa tirk zurrî kerdî û vat: “Helîkopterê ma şeq bîyo.” Gerîla dîmen vila kerd, gam bi gamî antbi kamera, kamera de vatênê, “Saet Xweş (weş)!” Tena ney nîyê. No zimistanî de zî Amed de yew teyarê artêşa tirk amê vistiş. Tirkan vat ke, “Bi sebebê problemêk teknîkî ra teyareya ma kewta.” Dima ra eşkera bi ke, gerîla teyare vista. 

Nika zî Sêgirke de eynî zurrê dewleta tirk û AKP’yîjan vejîyê werte. Gerîlayê HPG vanî, ma koordîneyê şerê KATO û BESTA, zerre helîkopterî de îmha kerdî. AKP ra yew veng nêvejîyeno. Yewe tirk zî nêeftereno vengê xo bikero. Herkes sey dewletê xo ya zureker bîyo zureker. Dewleta ke netewa kurd înkar bikero, a dewlet û rayedarê aye rastî qisey kenî gelo?