Her çiqas ke hukmatê AKP wazeno Sîstemê Serekî bîyaro Tirkîya û seba Serekkomar Erdoganî rayîrê dîktatorî biakero zî, labelê raya pêroyî ya Tirkîya eynî fikir de nîyî. No zî netîceyê ke seba Sîstemê Serekî yeno viraştiş de bi hawayo aşkere yeno dîyayîş.
Verê cû Şîrketê Anketan yê Gezîcî no derheq de anketêk viraştbî û netîceyê ci de sera 58 yê raya pêroyî nêwaştbî ke Sîstemê Serekî Tirkîya de bêro awankerdiş. Nika zî no derheq de Şîrketê Anketan yê Sonarî anketêk viraşt û netîceyê ci aşkere kerd.
5 hezar kesî beşdar bîyî
Şîrketê Anketan yê Sonarî mabênê 1 û 25ê kanûne de Stenbol, Tekîrdag, Balikesîr, Îzmîr, Aydin, Manîsa, Bursa, Kocaelî, Anqara, Konya, Antalya, Samsun, Trabzon, Edene, Kirikkale, Kayserî, Zonguldak û Kastamonu de bi 5 hezar kesan reyde anketêk viraşt û persê ‘şima Sîstemê Serekî wazenî an nê?’ persê şarî kerd.
Raya pêroyî nêwazeno
Goreyê netîceyê anketî sera 44,6 ya raya pêroyî ya Tirkîya Sîstemê Serekî nêwazeno. Reyna sera 42,3 ya raya pêroyî ya Tirkîya zî wazeno ke Sîstemê Serekî Tirkîya de bêro awankerdiş. Hûmara kesê ke fikrê xo aşkere nêkerdî zî sera 13,1 bî.
AMED