Kurdistanijê ke welat de yê ke teberê welat de yê serva serbestiya Rayverê xo seferber biyê. Jû hetî ra îmze erzenê û vanê ‘Öcalan’ îradeyê miyê siyasî yo û serbestiya ciya fizîkî wazenê, heta bîn ra serva ke serbestiya Öcalan bîro ca nûmayişanê ciya ciya virazenê. Goreyê zonayişê ke platformê ‘serva haştî, Öcalan’î rê serbestî’ day heta nika panc milyon ra vêşî îmze amey arekerdin. Tenya Kurdan nê, Tirk, Ermenî, Asûrî, Çerkez, Laz, Romen û şaranê bîn yê ke tirkiye de yê zî ebi eştişê îmze tewrê kampanya bî.
Çi ke waştena serbestiya Öcalan, waştena ameyina haştî ya, demokrasiya. Waştena cuwyana serbest a. Serbestiya Öcalan serbestiya ceniyan, serbestiya netewiya. Serbestiya Öcalan peyni ameyia zihnîyeta serdest, cinsîyetperwerî, netewperwerî ya. Serbestiya Öcalan serbestiya fikir, serbestiya pêrokîn kamî, ziwan û netewan a. Cok ra ceniyan ra heta qeçik-domonan, gencan ra heta kal û pîran se hezaran kes serva ke Rayver Öcalan hetê fizîkî serbest bibo zerreyê seferberîn de yê. Çi ke şarê Kurd bi hewldayen û rayverîna Öcalan’î de hewnê merdiş ra werziyay û newede ra ganî bî. Öcalan’î newede ra rih da no şarî û ganî kerd. Netîceyê nê hewldayenan de şarê do zane, dînamîk, wayrê îrade, fikir û felsefe roniya. Û no şar nika zî serva-qandê serbestiya xo lejê en gird yê na tarixî dano. Veriya ronayişê PKK herkesî jû derbe day Kurdan ro û înan perçiqnay. Winî kerdî ke, kesî nêşa behsê Kurdbiyîn bikero. Nefes girotiş zî zaf zehmet bi. La nika pêrokin dinya behsê cesaret, îrade û serhewaderiya Kurdan keno. Peynî de bi xoverdayişê Kobanê ra piya fina ispat bi ke endî kes nêşeno verra Kurdan hesabê şaş bikero. Serkewtişê Kobanê serkewtişê felsefeyê Rayver Öcalan’î yo. Serkewtişê paradigmayê demokratîk, azadîwaşt û ekolojîk o. Serkewtişê ceniya azad o. Serkewtişê tewr gird yê se serra 21. yo. Endi xet û îdeolojiya Öcalan’î Kurdistan de gam bi gam ganî bena. Endî jû netewa newî ya wayrê felsefe, wayrê qûwet û wayrê zanabiyen za bena û gerek pêrokîn dinya biyayişa na netewî qebûl bikero û hesabê şaşî nêkero.
Qederê demê çarekerdinê demokratîk, yê hikûmeta AKP zî ebi na babed ra girêdayiyo. E ke hikûmet vana ma meseleya Kurd çare kenê gerek serbestiya Öcalan biyaro ca. Çi k e bê serbestiya ey na mesele hal nêbena. Nayî ra gune kes xo nêxapîno û babeda Öcalan’î de şaşiyan nêkero. Wa herkes bizano ke, e ke Öcalan serbest nêbo, çarekerden zî nêbeno, pêvaco qediyek yeno, şansê peynî yê dewlet qediyeno , kaos û herbê newî dest keno ci. Endî tercîx yê hikûmet o.
***
Babeda bin ya ke nika rojdem de ya, ronayişê Kongreyê Ceniyanê Serbest KJA ya. Hetê Tirkiye û vakûrê Kurdistan de cenî dê neyra tepya tekoşîna xo bi KJA biramnê. Pêrokîn cenî qûwetê xo, vengê xo kenê jû. Kongreyê KJA de zî ceniyê Kurd, Tirk, Laz, Çerkez, Ermenî û yê bînî ca girotî. Tiya ra zî ayseno ke KJA do do pêrokîn ceniyanê Mezopotamya û Anatoliya temsîl bikero. KJA aşkere kerd ke hedefê înan de înşa kerdişê netewa demokratîk û ciwyana azad esta. KJA ya ke ser paradigmayê Rayver Öcalan’î de roniya nika ra serva ceniyan û şaranê azadîwaşt omid, serva sîstema serdest tersê do gird rona. KJA do zey tîja rojî ser pêrokîn ceniyanê rojhilatamiyanî de akewo. Pêrokîn ceniyan rê bimbarek bo.