Dêrsimijî aşmanê payîzî de amadekarîya zimistanî kenî. Kesê ke dewa Kavaktepe ya Mazgêrdî ya Dêrsimî de cuyenî, arêdayîşê engure ra dima dest bi viraştişê şerbetê engure kerd.
Dewijî engura ke mîyanê rezanê xo ra arê danî û dimayo ke di rojî danê arisnayene, engure kenî mehsere û eciqnenî. Awa engure ya ke arê danî qazikanê girdan de nizdîyê 10 saetan adiro gur ser o girênenî. Badê girênayîşî, şerbet newe ra yeno nesilnayene û kupan de yeno cakerdene. Şerbeto ke erzîyeno mîyanê kupan cayo honik de yeno vindarnayene.
Necla Şahîna derheqê viraştişê şerbetî de ajansê Mezopotamya rê qisey kerde. Şahîne dîyar kerde ke tehmê şerbetî zaf weş o û seba weşîye zî zaf hol o. Şahîne va ‘şerbet herinda dermanî de yeno şimitene’ û wina dewam kerde: “Heme dewanê ke rez tede esto de şerbet yeno viraştene û aşmanê zimistanî de hetê her werî de yeno şimitene. ”
PÎRHA / DÊRSIM