EHMED SEMÎR / ANHA / BEREKAT
Serçeteyê DAÎŞî Xidir Derwîş (Ebû Elî Bêskî) ke hetê Hêzê Sûrîyeya Demokratîke (QSD) ra amebi tepiştene, derheqê rêxistinbîyayîşê DAÎŞî û têkilîya ci û MÎTî de melumatê muhîmî dayî. Derwîşo ke herêma Cizîrî de mendo û xeylê zirar dayo şarî, demêk Tirkîya de mendo û dima ra derbazê Efrînî bîyo.
Derwîşî da zanayene ke xeylê serçeteyê DAÎŞî yê sey Ehmed Nezîr El-Xelef û sewbîna zî Efrîn de yî û ewja de rêxistinbîyayîş kenî û wina domna: “Nezîr El-Xelef yewîyêka taybete ra berpirsîyar o û na yewîye goreyê talîmatanê El-Xelefî hereket kena. Mabênê kesê ke na yewîye de ca gênî û îstîxbaratê dewleta Tirkî de têkilîyê xurtî estî.”
Çeteyanê tepişteyan ra Ebû Muazî zî va Idlib de bi nameyê ‘Şerî Komîte’ de fermandarîyêka DAÎŞî esta û wina dewam kerd: “Hêrişê ke Vakur û Rojhelatê Sûrîye de benî, goreyê talîmatê na komîte benî. Idlib bîyo merkezê hêrişan. Fermandarê DAÎŞî heme Cerablus, Bab û Idlib ke binê kontrolê dewleta Tirkî de yî manenî. Nê fermandarî badê ke Derazor de binkewtî, derbazê cayanê ke destê Tirkîya de yî bîyî. Cayê ke destê Tirkan de yî DAÎŞ xo newe ra rêxistine keno. Bi nameyê Ehrar El Şerqîyê de çeteyêk çeteyanê hêrişkaran derbazê Vakur û Rojhelatê Sûrîye keno.”