Coka Erdogan û AKP hîzbul-kontray vistî dewre. Wast bi destê kontrayana kêfweşîni pirnika kurdan û dostan ra biyarê. La belê enê hesabê Erdogan û AKP zî nêtepişt.
***
Wexto ki Erdogan û AKP hedreyinê plananê bînan kerdê, Rojawa ra zî, pêsero xeberê serkewtinanê newey ameyê. YPG/YPJ çarçiweyê Hamleyê Fermandara Rûbar Qamişlo de, darbeyan sero darbey dayê çeteyanê DAIŞ ro. Quwetanê YPG 6’ê gulan ra na kişt, her roj xeylê cay çeteyan ra xelisinayê. Badê xelisinayinê Koyê Kizwanan, Mebrûka, Silûk bi seyan dew û mezrayan, verê xo da Girê Spî. Hedef bi temamî pak-kerdinê mabenê kantonê Kobanê û Cizîr bi. Hedef hetê cografyaya jew kerdinê her 2 kantonan bi.
***
Winî zî bi. Quwetanê YPG 15’ê hezîran de zî noxteyê peyin ê mabenê Kobanê û Cizîr de, sûka Girê Spî, bi nameyê bîna Til Ebyad bi. Girê Spî cayê zaf zaf stratejîk bi. Keverê lojîkstîk ê çeteyanê DAIŞ bi. Dewleta tirk wija ra alîkariyê DAIŞ kerdê. Kes şeno vajo, Keverê sînor ê Girê Spî, boriya nefesî ê çeteyanê DAIŞ bî. Her metreyo ki quwetê YPG/YPJ nezdiyê Girê Spî bî, heyecanê kurdan û dostan biyê vêşî. Eynî wext de, tarsê rayverîna dewleta tirk, bi taybetî jî Serekkomarê tirk Tayîp Erdoganî biyê vêşî. Zey kurdan û dostan, çimê herkesî açariyabi Girê ser û mîjdana xelisinayinê Girê Spî pawitê.
***
A mîjdan, şanê 15’ê hezîran de amê. YPG/YPJ û Burkan El Firat verî keverê sînor û bado zî pêrinê Girê Spî xelisina. Heme cayê mabenê kantonê Kobanê û Cizîr çeteyan ra bi pak. Hetê cografyaya kantonê Cizîr û Kobanê bî jew. Qandê Kobanê ray abiyê. Hinî Til Koçer ra hetanî royê Firatî, heme cay kewtî binê kontrolê YPG. Bi vatena bîna, Kobanê hinî mûhtacê Tirkiye nêbeno. Hinî qandê rîştinê jew aryey, bi hefteyana ariq merijiyo. Bi vatena kilma, YPG vera siyasetê bi raya keverê sînor ê Sêmalka û bi veyşanîna terbiyekerdin, keverê sînorê Til Koçer akerd û planê heveyê çoşman xeripinay, vera eynî siyasetê dewleta tirk zî Girê Spî xelisina û raya Kobanê akerd.
***
Eynî wext de, bi xelisinayinê Girê Spî, borûya nefesî ê çeteyanê DAIŞ girotiya. Hinî zey verî Tirkiye meşo rehet û bi kamyon û otobusana cebilxane û çeteyan birêşo Sûriye. Teniya bişo keverê sînor ê Jarablûs û El Raî birêşo. La belê wijay hem dûriyê, hem çimên dinyay wijay seroyê û hem jî hedefê YPG de nê. No sebeb ra Erdogan, AKP û medya ci, qandê Girê Spî qiyamet qilaynê. Coka bi zûranê zey “pakîna etnîk” hewl da welatijanê ereb vera YPG/YPJ vejo. La belê welatijê bi zilmê DAIŞa rî bi rî bî, goş nêda Erdoganî. Nêwast qandê DAIŞ mertagîn bikiro. Qandê mertagîn mekiro, wast sînor ra ravêro. La belê rayveranê tirk bi rojan nêvirada. Senî ki welatijan bi xo ê têlê teliyinî hewaday, mecbûr mend, înan bigiro zere.