“Kobanê bajarêko hempar ê dinya yo. Hêrişê ke vera Kobanê de benî heme şaranê dinya rê benî.”

Hemserekîya Konseyê Caardişî yê KCKyî bi wesîleya serrgêra 1ê teşrîna peyêne Roja Kobanê ya Dinya îzhetêko nuştekî daye. Hemserekîye daye zanayene ke 4 serrî cuwa ver çar hetanê dinya ra demokrat, sosyalîst, roşinvîr, nuştox û hunermendan 1ê teşrîna peyêne sey Roja Kobanê ya Dinya îlan kerd.

Hemserekîye dewamê îzehetê xo de wina vato: “Na roje de şaranê cîya - cîyayan ra bi mîlyonan merdimî vejîyayî meydanan û paştî dayî xoverdayoxanê Kobanê ke hemverê DAIŞî de bi fedaîtîye şer kerdêne. Paştîdayîşê 1ê teşrîna peyêne ya 2014î bîyo destpêkerdişê qedîyayîşê DAIŞî û planê fetisnayîşê Şorîşê Rojawanî yê AKPyî zî pûç ameyî vetene.”

Hemserekîye îzehetê xo de qala muhîmîya serkewtişê Kobanê kerdo û wina vato: “Serkewtişê Kobanê ke bi paştîdayîşê 1ê teşrîna peyêne sey Roja Kobanê ya Dinya ame destkewtiş, tena serkewtişê Kobanê û kurdan nîyo, heman wextî de no serkewtişê şaranê dinya yo. Kobanê bajarêko hempar ê dinya yo. Hêrişê ke vera Kobanê de benî heme şaranê dinya rê benî.”

AKP û MHP polîtîkayê dişmenî domnenî

Hemserekîye dîyar kerdo ke îqtîdarê AKP-MHPyî bi polîtîkaya dişmenatîye vera Kobanê û Şorişê Rojawanî hêrişanê xo zêdneno û îzehet wina dewam kerdo: “Vakurê Sûrîye de îstîqrarê aştîye tehdît keno. Nê hêrişê ke kombîyayîşê paştîdayîşê faşîzmê AKP-MHPyî ra dima ameyî destpêkerdene,  Almanya, Fransa û Rûsya zî hemparê nê sucî kerdî. Ê ke vera DAIŞî yê paştîdayîşê Kobanê deynê milê înan o.”

‘Ganî şarî nê kayan bixeripnî’

Hemserekîya Konseyê Caardişî yê KCKyî  peynîya îzehetê xo de wina vato: “Faşîzmê AKPyî bi nê hêrişan hetêk ra dişmenîya xo ya şaranê Surîye ramojneno, hetêk ra zî bi şovenîzmî hadreyîya weçînitişê 31ê adara 2019î keno. Hedefê înan de qezençkerdişê weçînitişê herêmî esto. Bi na game ê eşkenî dîktatorîya xo bi temamî bidî cakerdene. Ganî şarê kurd, tirk û heme şarê dinya nê kayanê AKP-MHPyî bixeripnî. Şarê Tirkîya û hêzê demokratîkî ganî weçînitişî ya verî heme kayanê înan deşîfre bikerî. Nê hêrişan de karê şaranê Tirkîye çîn o. Tena hêrsê şarê herême yê vera Tirkîya zafêr beno. Coka ra ganî heme hetê sîyasî, demokrat û muxalîfî yê Tirkîya hemverê nê hêrişan de vinderî û destûr nêdî faşîzmê AKP-MHPyî.”

 

ANF / BRUKSEL