Welatê ma esto la ma welatê xo di esîrî. Ziwanê ma esto la zerrê feke ma di qefilya yo.

Qijî-tut- ma estî la ma teslîmê dagirkeran kerdî. Çîyo en xirab zî  o yo kî, merdimê dagirkeran bi name cemaat bîyerenê welatê ma di Olîmpîyatê Ziwanê Tirkî virazenê.
Çend serrîya Cemaatê Fetullah Gûlen, Kurdîstanê de Olîmpîyatê Ziwanê Tirkî virazeno. Bi şîyarê kî zî nameyek nawo pa,vanî “Cîhanek Newe”. Cîhanek Newe ya yan zî Cîhanê Tirkî ya?
Şarê ma, qijanê xo bi destê xo geno teslîmê dagirkeran keno. Teslîmê Fetullahîyan keno. Dewlet û Fetullahî qijanê-tut- Kurd-Zaza,Kurmanc- bi hîş û ziwanê Tirkî perwerde kenî.Qijanê ma,hina perwerde kenî, tayî qijanê ma xo  ze Tirk qebul kenî. Dewlet û cemaatê Fetullahî,  mekteban bes nîvînenî, dersxaneyan akenî, salonê wendişî akenî. Na çîyan bi name medenîkerdiş, bi name wendiş raverbenî.
La meqsedê dewlet û Fetullahîyan a  esasî wendiş nîya. Medenîyet zî nîya. Meqsedê înan a esasî, qirkerdişê Kurdana. Wazenî bi name wendiş û medenîyet Kurdan bikerenê Tirk.
Xo ra wexto kî, Kemalîstan ser Dêrsîm, Agirî, Qoçgirî, Oramar, Sason, Mutkî qirkerdiş viraştenê, vatenê “ma medenîyet benî uca”.
Kemalîstan ser şarê Kurd qirkerdişê  fîzîkî kerd la bes nîdî, ser ra qirkerdişa sipî-çandî,kultûr- romit.
Nika zî eynî çîyê Kemalîstê Zergun-AKP û Fetullahî- dewam kenî. Vanî “Ma medenîyet anî Kurdîstan. Ma wendiş anî Kurdîstan”. Bin nê name de qijanê ma genî, keynayê ma genî kenî Tirk. La şarê ma zî bi destê xo qijanê xo, keynayê xo teslîmê dişmenê xo keno.
Ser ra  zî Kemalîstê Zergun-AKP û Fetullahî- yenî zerrê Kurdîstanî de bi ziwanê Tirkî, Olîmpîyatê Ziwanê Tirkî virazenê, kes hemverê înan nîvejîyeno.
Semsûr-Adiyaman- de virazenî Kurdekî çîyêk nîvano. Wan de virazenî Kurdekî çîyêk nîvano. Çewlîg de virazenê Kurdekî çîyek nîvano.
Tayî kesên kî bav û dayîya înan Kurdî, la eyê bi xo dewşîrmeyê Tirkanê seba Olîmpîyatê Ziwanê Tirkî pere danî. Heme mesrefe  organîzasyonî genî ser xo û qirkerdişê şarê Kurdî de cirm kenî.
Yew vateyê verênan ma esta vanî “Kutiko xirab vergî ano gewê”.
Çewlîg de, Semsûr de, Wan de tayî merdimê dagirkeran estî, ze verênan ma vato, heme çîyê dagirkeran anî kenî zerre Kurdîstanî.
Gorê peymanê cirme qirkerdişê mîyan netewî a 9 Kanunê 1948 çîyê hina kerdiş cirmê qirkerdişo. Kes no raştî zaneno gelo?
La şarê ma seyî no qirkerdiş qebul keno.
Vengê xo nîvejeno. Seba şarê Kurd û Kurdîstan şerma.
Seba şarê Kurd û Kûrdîstan şerma kî Olîmpîyatê  Ziwanê Tirkî zerre Kurdîstanê de biyero viraştiş.