Serra 2014 de zafî qewimyayîşî muhîmîyan ra ravêrîyay û şahîdeyî kerde. Bi verênî ra rayîrê muzakerî û çareserî abe. Dîyine zî Rajawanî îlankerdişê Xoserîya Kantonan. Hîrine zî hemverê çeteye DAIŞ ra xoverodayîşê YPG bi. Çarine zî hemverê qirkerdişê çeteyê DAIŞ ra serehewenayîşê şarê kurd bi. Pancin zî hemverê qirkerdişê Şengalî ra xoverodayîşê pawitişê HPG bi.
Şeşine zî hemverê qirkerdişê Kobanî ra yewbîyîşê netewîya kurdan bi. No sebeb ra yo ke kurdî bi raya verênîya yê ke hinde zaf serkewtişî ra nizdî bîyê û serneweya 2015 şarê kurdan ra bena serkewtiş û serfirazî. Semeda ravêreyî ya çareserî ra bi raya verênîya ke kurdî hinde xora zaf bawerî kenê.
Heyana ewro seba pêameyîşî ra zaf ray Tevgera Azadîya Kurd yew hetî ra bê çalakî îlan kerde. No warî de her dem PKK çiqas yew hetira bê çalakî îlan kerde û dewleta tirk zî îlankerdişê bê çalakî zî sewbîna hewa hesibna. No warî de beqaya dewlete xobixo vatê Tevgera Azadîya Kurd hêza înan zaf zayif bîya û no sebeb ra menawra kenê.

Qet samîmî nêtêgerîyay
No warî de dewleta tirk her wext hemverê îlankerdişê bê çalakî ra kayê qilêrinî kay kerdî û no warî de samîmîyetê Rayverê Şarê Kurd Abdullah Ocalanî ra faydeyî kerd û suîstîmalî kerd. Ancî zî seba ravêreyîya çareserî ra Rayverê Şarê Kurd Abdullah Ocalan qet aciz nêbe û eynî hewayê yew derzine ra aşênayîşê yew bîrî akerkerd. No hewa yew rewşa sabirî û yew rewşa bawerî encex yew Pêxemberî yew Mesîhî de bena.
Bi netîceyî de zî Rayverê Şarê Kurd no warî de bi xêza xo de serkewtiş bi û game de game dewleta ante rayîrê ravêreyî ya çareserî.
Enka zî dewlete nêeşkena ke rayîrê ravêreyî ya çareseserî ra biremo. Nay ra zî hukûmata AKP seba ravêreyî ya çareserî ra kayê qirêjîya Osmanî kay kenê û rewşa herbê şerê psîkolojî kay kenê û gurênenê.

Operasyonan zêdînay
No warî de hukûmatê AKP her beyanatê xo de qalê qiseyê ravêreyî kenê. La mixabin zî seba ravêreyîya çareserî ra çekî zî nêkenê. Bi rewşa eksî ra zî her roj operasyona virazenê û ciwanê kurdan tepîşenê kenê peyê beran û yew bi yew qetil kenê. Seba ravêreyîya çareserî ra qet yew samîmîyet çinî yo.
Tewr peynîyê de zî Cîzîre de viraştişê provokasyonî de Şeytan Hur Partî 2 ciwanê kurdan qetil kerdî û no warî de zî hukûmatê AKP nê hîzbê şeytanî mahsûm nawnayî û bi tena ciwanê kurd sûcdar kerdî. Bi qewimyayîşê Cîzîre ra aseno ke AKP hema zî kayê xonê qirêjîyê Osmanî de dewam kenê.
Rojhelatê Mîyanênî de dîrokî de bi raya verênîya ke yew firset kewt destê kurdan. Vaşûrê Kurdistanî de rijnayîşê pergalê Sadamî ra yew awantaj kewt destê kurdan û her çiqas nê awantaj sayedê DYA ra bi se zî, ancî zî bi hetê kurdanê Vaşûrî ra yew awantajo gird bi. Tewr muhîm zî Rojhelatê Mîyanênî de Rojawanê Sûrîye de kurdan Xoserîya Kantonanê xo îlan kerd.

Rojawan ra etiryenî
Nê îlan kerdişê xoserîya Rojawanî zaf muhîm bi. Çimkî nê xoserî hînê ravêreyî de bîynê xoserîya heme Rojhelatê Mîyanênî û bingeh tepişte. Bi verênî ra nê îlan kerdişê xoserîya Rojawanî hema hema heme hêzê hegomonîkî nêrehet bîy û kewtî rewşa panîkî.
No sebeb ra zî hêzê emperyalîstan bi raşta raşti ra nêşêna ke mudaxeleyê Rojawanî bikerê û nay ra zî hemverê Rojawanî ra çeteye DAIŞ gurênayî. Nê çeteye DAIŞ heme hêzê emperyalîstan mîyanê de ca girotê û paştî danê bide.

Tanqî kura ra ardî?
Na zî çeteye DAIŞ hinde topî, tanqî girdî kura ra ardî? Hemverê nê çeteyan ra bi hesaban ra hem Ordîyê Azadîya Sûrîye şer kenê û hem zî DYA hewayî ra pey teyaranê şerî bombardiman kena. Her çi ecêbo zî, nê çeteyi yew tewr nêqedîyenê.
Nê çeteyê bi hesaban ra bi nameyê îslamî ra vejîyay raşte û heyana ewro zî hemverê Îsraîlî ra yew tek gule nêvistî. No senîhewa îslameteya? Îslamî ke bi tena kurdan reyde şer bikerê û qirkerdişê sîvîlan bikerê. No warî de qet yew Qulê Homay nêperseno çîyrê nê çeteye DAIŞ mademkî hinde hêza înan esta çîyrê verba Îsraîlî ra yew tekgule nêvistî. No hewa yew nakokîya gird a.

Şarê kurd seyd nîyê
Ancî zî hemverê nê hêzê çeteyanê emperyalîstan ra Rojawanî de şarê kurd destanê xoverodayîşê girdî nuştî û hema zî nusenê. No sebeb ra yo ke Rojawanê Kobanî de rijnayîşê çeteye DAIŞ rijnayîşê heme hêza emperyalîstan a.

Rojawanê Kobanî de serkewtişê kurdan serkewtişê heme mêrdimano û xelisyayîşê heme miletano. No sebeb ra yo ke serra 2015 bena serkewtişê heme bindestanê miletan. Bi taybetî zî nê mîmarê serkewtişî zî Rayverê Şarê Kurdan Abdullah Ocalan o. Serrneweyê 2015 ra Ocalan morê xo dano piro. Nê serrneweyê 2015 heme kesan ra pîroz û bimbarek bo.


ZAZA CEBELÎ