Qûwetanê serdest waştî serra 2014’î zî serva Kurdan açarnê serra qetlîam û gonî. Goreyê na planî cayo ke Kurdan destpa înşakerdişê sîstemê xo yê demokratîk kerd weçînay.
Bi destê çeteyanê DAIŞ serraçarnayina şoreşê Rojawa 19’ê Tirmeh de waştî Kobanê îşgal bikerê. Çi ke şoreşê rojawa Kobanê de destpa kerd bi. Waştî ke cayo ke şoreş destpa kerd, o cayî de biqedînê.
La no panc aşmiyo Kobanê serva DAIŞ açarniya cayê cihenem. Çi ke înan emel nêkerd ke raştê hendayî xoverdayin bîrê.
2014’î de Kobanê tenya Kurdistan de nê, pêrokîn dinya de bi sembolê xoverdayiş û serkewtiş. Kesê ke nameyê Rojawa nêaşnawitî, bi xoverdayişê Kobanê pêrokîn Kurdistan û şarê Kurd silasnay û dawaya Kurdan a rewa heqdar dî. Cok ra 1’ê Mijdare zey ‘roja Kobanê’ amê îlankerdin û pêrokîn dinya serva wayirvetişê xoverdayişê Kobanê werziyay ser payan. Çi ke herbê Kobanê herbê mavêna serdest û bindestan o. Winî ayseno ke, rixmê pêrokîn hêriş û hewldayinanên qetlîam şarê Kurd do Kobanê û rojawa de sîstema xo ya xoser înşa bikero.
Jû babeda bîn ya ke mora xo da 2014’î Şengal bî. Çeteyê DAIŞ yê ke misalatê Kurdan bî, 3’ê Tebax’î de eştî Şengal ser. Peşmergeyî zî verra nê hêrişanê çeteyan remyay û şarê Êzidî bi qetlîaman ra rî bi rî viraday û Şengal kewt qontrolê çeteyan. Bi hezaran êzdî amey qetilkerdin, hezaranê ci amey remnayen. Çeteyan tecawizê ceniyanê êzdî kerdî, bi hezaranê ci zî remnay, bazaran de zey kole rotî. Des hezaran êzdî serva ke xo bireynê-bixelesnê verê xo day leteyanê bîn yê Kurdistan û vilayê welat bî. Bi hezaranê ci zî rixmê talokeyê qetilkerdiş koyanê Şengal de mendî û hona zî ewja de yê. Gerîlayê Kurd û qûwetanê pawitenê şar YPG-YPJ vazday hawara şarê ma yê êzdî û verniya qetlîamanê girdî girotî.
Badê xoverdayiş û pirodayişê 3 aşman, 20’ê Kanûne de mijdaniya xelesnayişê Şengal amê.
Qûwetanê eskerî yê Kurd verra çeteyan operasyon viraşt û sûka Şengal DAIŞ ra kerd pak, pirodayişî hona zî ramenê.
Rojdema Tirkiye û Kurdistan de, emserr babeda ke cayê do hera girot; ‘pêvacoya çarekerdina demokratîk’ bî. Rayverê Kurdan Öcalan’î 21’ê Adar 2013’î de bi vatişê ‘wa tifingî bêveng bê, fikrî qisey bikerê’ startê dewrê do newî da. Peycoy mavêna heyetê dewlet û Öcalan’î de pêdiyayinî destpa kerdî. Rixmo ke hikûmet goreyê nayî heta nika gaman nêeştbo zî, hewldayenê rayverê şarê Kurd û yê kişta Kurd emserr zî dewam kerdî. Rayverê şarê Kurd serva çarekerdinê demokratîk jû teslax kerd hadre û peşkeşê dewlet kerd. Teslax zey kilîtê çarekerdin yeno vînayen û şansê peynî yê dewlet o. E ke hikûmet goreyê na teslax gaman bierzo serra 2015’î do bibo serra serkewtiş û çarekerdin.
Zewbîn geyrayişê edalet yê Roboskîyijan emserr zî bê cewab mend. Dewleta qetilkar a ke hesabdayin ra remnena, hewl dana 34 kesê ke 28’ê Kanûne 2011’î de amey qetilkerden sucdar bikero. La Roboskîyijî vanê heta ke kiştoxî hesab bidê ma dê pey na dewlet nêviradê.
Û dirbeta bîn yê Kurdan, a ke hona gonî dana; qetlîama Parîs. Şarê Kurd emserr zî her hefte bi slogana ‘bêvengiya şima piyakariya şima ra ya’ meydanan de waştişê edalet kerdî. Pêrokîn dewletî û qûwetî xo nayî rê kerr, korr û lal bikerê zî, ê dê peyniya peynî de hesab dayiş ra nê reynê.
Heta bîn ra netîceyê polîtîkayanê hikûmet Tirkiye û Kurdistan de emserr zî kiştiş û şîdeta verra ceniyan dewam kerd. 260 ra vêşî cenî amey qetilkerden. Ceniyanê Kurd verra zihnîyet û sîstema serdest a ke raya qetilkerdişê ceniyan akena tekoşîna xo na serr de berz kerdî. Na tekoşîn sîstema serdest yê camêrdan tersnena, la omidê gird dana ceniyan. Winî ayseno ke şarê Kurd do bi nê babedan dekewo 2015’î. Omid kena ke serra newî serva şarê Kurd û pêrokîn şaran bibo serra serbestî û haştî. Serra şima ya newî bimbarek bo.