Şervana YPJ'ê Bêrîvan Efrîn û Şervanê YPG'ê Ozgur Dêrik di 20'ê Gulanê de dema bersiva êrîşên hêzên rejîma Baasê ya li dijî taxa Miftî ya Hesekê didan jiyana xwe ji dest dan. Cenazeyên herdu cangoriyan biribûn nexweşxaneya Dêrikê. Bi hezaran kes ji xelkên Dêrikê, Qamişlo, Tirbespiyê, Girkê Legê û Çilaxa li ber nexweşxaneyê hatin cem hev. Serokê Desteya Karûbarê Civakî Dijwar Ehmed, Endama Koordînesyona Yekîtiya Star Henîfe Hisên û Fermandara YPG'ê ya Herêma Dêrikê Şîlan Amûdê jî tevlî merasîmê bûn.

Girseya ku posterên Rêberê Gelê Kurd Abdulah Ocalan û wêneyên şervanên YPG'ê vekir, alên TEV-DEM, YPG û YPJ'ê hilda, cenaze wergirt. Piştî wergirtina cenzeyan girseya gel bi karwanekî wesayîtan ber bi goristana Şehîd Xebat Dêrik ve birê ket.
Li goristanê merasîm hate lidarxistin. Merasîm bi rêzgirtinê dest pê kir. Piştre Serokê Desteya Karûbarê Civakî yê Herêma Cizîrê Dijwar Ehmed, Endama Koordînesyona Yekîtiya Star Henîfa Hisên, Endamê Saziya Malbatên Şehîdan Hisên Ubêd axivîn û êrîşên hêzên rejîmê yên li dijî gelê Hesekê şermezar kirin û gotin ku êrîşên Hesekê bi awayekî yekser bi kolandina xendekan ku ji aliyê PDK'ê ve, êrîşên DAIŞ'ê ve hene û hate gotin hemû li navendekê hatine plankirin.
Di axaftinan de her wiha hate gotin ku armanca hemû êrîşan têkbirina rêveberiya xweseriya demokratîk e ku ji aliyê hemû pêkhateyan ve hatiye avakirin.
Piştî axaftinan girseya gel cenazeyên herdu canoriyan bi tilîlî û dirûşmeyan spart axê.

DÊRIK