SÎNAN DENÎZ / ANF / KOBANÊ 


Ewro serrgêra Azadbîyayîşê Kobanê yo. Xoverdayîş û serkewtişê Kobanê bi fedakarîya merdimî ame qezenckerdiş. Şero ke êlula 2014 de dest pêkerd û 26ê çileyê 2015 de bi serkewtiş netîce bî. Na hîkaye eynî wextî de hîkayeya serkewtişî ya. Çîyê ke bîyî sebebê azadbîyayîşê Kobanê çi teyara, çi tanq û top bî; çîyo ke bî sebebê azadîye merdimo bawerkerde bî.

Merdimê ke no oxir de canê xo dayî, zerrîya şaranê dinya de nameyê xo neqişnayî, yê mendî zî bi hawayo nîmcet mîyanê şorişî de xebatanê xo domnenî.  Ocalan Amara û Kandîl Yilmaz zî nînan ra 2 kesî. Her di zî domanê Kobanê yî.

Kurdî mecbûr nîyî 

Ocalan Amara serra 1994 de dewa Xizine ya Kobanê de mîyanê keyeyêko feqîr de yeno dinya. Seba ke problemê ekonomîkî yê keyeyî estî, keyeyê ci ancax eşkeno 2 serran ey bierşawo mekteb. Yew xalê Amarayî zî serra 2009 de Kurdistan de merdo. Keyeyê Ocalanî nizdîyê Reqqa de dewêk de bica beno û ewja de mîyanê hêgayêk de xebetîyeno. Keye wexto ke Reqqa hetê çeteyan ra yena girewtiş ra ver reyna koçê Kobanê keno. Keye senî ke agêreno Kobanê, Ocalan Amara zî beşdarê YPGyî beno. Ocalan Amarayî qiseykerdişê xo de vano ‘Wexto ke ez Reqqa de bîya, mi bi hawayo baş dî û fam kerd ke kurdî mecbur nîyî ke tim bêrî pelçiqnayîş û raştê heqaretî bêrî.’ Amara perwerdeyê xo yê sifteyîn Kobanê de vîneno. Dima ra Amarayo ke beşdarê şerê Girê Sipî û Sirrinî beno, wexto ke tecrubeyêk qezenc keno, cepheyê ke Kobanê rê benî tehdît mîyan de ca gêno.”

2 reyan birîndar beno 

Amara Ocalanî dewamê qiseykerdişê xo de wina va: “Çeteyê ke na herême de bî, hemînan zî waştêne ke Kobanê bigirî. Seba nê waştişê xo zî bajarokanê Sirrîn û Girê Sipîyî xebetnayênê. Dima ra dest bi hêrişan kerdî û mi heta 25ê teşrîna peyêne pawitişê rojhelatê bajarî de ca girewt. Mi nizdîyê 2 aşman meterîsan de xebate kerd û dima ra ez linga xo ra birîndar bîya, la embazêk mi şehîd kewt. Ez seba tedawî derbazî Vakurê Kurdistanî bîya û mi ewja de aşmêk tedawî dî û ez agêraya. Wexto ke ez agêraya mi dî ke Kobanê de însîyatîf kewtbî destê embazanê ma û ez zaf kêfweş bîya. Ma êdî merkezê Kobanê de vera çeteyan de dest bi hemleyê hêrişan kerd. Wexto ke ma merkezê bajarî xelesna, ma dest bi hemleya azadkerdişê dewan kerd.  Tîya de yew fabrîkaya ke wextê fransîyan ra mendbî, estbî û wexto ke ma waşt na fabrîka bigirî ez reyna birîndar bîya. Mi reyna Vakurê Kurdistanî de nizdîyê 4 aşman tedawî dî.”


Keyeyê ci sînor ra nêqerfîya 

Amara Ocalanî dewamê qiseykerdişê xo de yê ke vatbî ‘do Kobanê 3 rojan de bikewo’ ard vîr û wina domna: “Çend aşmî dima yê ke wina vatbî, na rey îtîraf kerdî û vatî ‘ma têk şî’. No bi xoverdayîş virazîya. Yê ke xo kerdî bombe û mîyanê dişmenî de teqnayî, embazê cinî bîy. Embaze Arîn hêzê cinîya kurdî bîye. Ma verê seba girê Kanîya Kurda û dima ra seba azadkerdişê dewan dest bi hemleyan kerd. Her kes zanayêne ke do kurdî Kobanê de qezenc bikerî, tena dewleta tirk nêyî qebul nêkerdênê.”  


Tena Kalaşnîkof estbî

Xoverdakarêko bîn yê Kobanê Kandîl Yilmazo ke nameyê ci yê rastikên Hawar Ahmet Îbrahîm o. Yilmaz dewa Şex Kamerî ra yo û 2 wayî û 3 birayê ci estî. Wayêk ci zî mîyanê YPJyî de ca gêna. Yilmaz o ke 5 serran şîyo mekteb, pîyê Yilmazî zî xizmetê xoverdayîşî kerdo û o zî nika dezgehê lojîstîkî de xebatanê xo domneno. Yilmaz o ke verê cû sereyê xo ra birîndar bîyo, nika qiseykerdiş de keweno zehmetî. Yilmazî wextê xoverdayîşê Kobanê de heme meterîsan de kedêka girde dano. Yilmaz dîyar keno ke ‘şerwanan de tena sîlehê Kalaşnîkofî estbî û tena sîlehêko giran estbî û o zî doçkaya 57î bî. O zî destê mi de bî.’

Şerê heme meterîsan taqîp keno 

Yilmaz dewamê qiseykerdişê xo de vano ‘ma dima ra dest bi azadkerdişê dewan kerd’ û dima ra guleyê doçkayî mîyanê sîlehî de xitimîya û netîceyê teqayîşê guleyî de birîndar beno. Yilmazo ke tedawîya xo ra dima agêreno Rojawanî, wexto ke ma ey ra pers kenî ‘şer senî bî?’ o zî bi kurmancî vano ‘baş bî’. Dima ra wexto ke ma persê ‘Ya ti şehîd bikewtêne se bîyêne?’ o zî vano ‘problem nîyo’. 

Hem Ocalan Amara û hem zî Kandîl Yilmaz Mala Birîndaran (Keyeyê Birîndaran) ke şerwanê birîndar tede manenî û tedawî vînenî de manenî. Yilmazo ke mîyanê şerî de ca nêgêno, şerê heme meterîsan taqîp keno û her serkewtişî ra dima rîyê ci de hûyayîş hîna zêde beno. 


SÎNAN DENÎZANF/KOBANÊ