Derbeya rehîn girotişê Hemserok û parlementeranê HDP ra dima, HDP sûkan de dest bi hemleya pêhet ameyişê bi şarî kerd. Bi hemleya xotenzîmkerdişî endamê HDP hewl danê ke sereştişanê AKP veng beverê. Qezaya Riha Sêwreg de zî wekîlanê HDP yê sûk kombîyayişê şarî viraştî û esnafan zîyaret kerdî.
Parlementeranê Riha yê HDP Dîlek Öcalan, Osman Baydemîr, Îbrahîm Ayhan û Hemseroka sûk Ayşe Surucu verîya kombîyayişî esnafanê Sêwreg zîyaret kerdî. Wekîlê ke raştê eleqeyekê gird yê Sûkijan amey bi esnafan ra derheqê qeyumyayişanê peynî sohbet kerdî û goş day vînayişanê înan.
Kurdî dê bi xo qerar bidê
Zîyaretî ra dima wekîlî seba kombîyayişê şarî ravêrdî bana HDP yê qeza. Parlementer Osman Baydemîr ke kombîyayiş de qisey kerd vist vîrî ke na seserr de şarê Kurd do bi qo kerar bido ke wazeno senî biciwîyo. Baydemîrî herzewbîn hayr ant sîstemê Rojawayê Kurdistan ser û va, “Rojawayê Kurdistan de Kurdan sîstemê xo yê xoser ronayo û îdareyê xo ebe xo kenê. “ Baydemîrî aşkere kerd ke hikûmeta AKP seba îradeyê Kurdan yê meclîsî bişikîno lej (şer) da destpa kerdiş û qandê (seba) ke tenya bibo îxtidarî no lejî kerd gird.
Xoverdayişê topyekunî
Baydemîrî vist vîrî ke zey HDP ê dê vera sereştişanê topyekûn, bi xoverdayişê topyekûnî cewab bidê û qiseyê xo bi nê vatişan qedêna: “Peynîya pêrokîn zilman îlla xoverdayiş o. Peynîya peynî de zalimî dê bibê qurbanê zilmê xo. Seddam bi qurbanê zilmê xo. Zilmê nînan zî do tewr peynî de açarîyo nînan bi xo.
ANF / RIHA