Seba xoverdayoxanê Kurd Dersim û Mersîn de merasîmê yadkerdişî virazîyay û sozê berzkerdişê tekoşînê înan ame dayen. Tornanê înan waştî ke cayê mezeleyê înan bîro aşkere kerdiş û arşîvê dewlete yê derheqê komkiştenî de bîrê akerden.
Dersim de Meydanê Sey Riza de merasîmê yadkerdişî virazîya. Merasîm de endamanê Platformê Jûbîyena Quwetanê Demokrasî û Emegî ra pîya xêlê kes hadre bî. Merasîma vîrarden ke ver Peykerê (qame) Seyît Riza de roja Sêşeme seat 17.38î de dest kerd ci de mûmî fiştray ci. Dima ra şêlig qurnefîlî ronay ver peykerî. Merasîm bi jew deqe vindertişê hurmet dest kerd ci.
Mavêna CHP û AKP de ferq çîno
Ser nameyê Platformê Jûbîyena Quwetanê Demokrasî û Emegî Hemserokê Komeleyê Elewîyê Demokratîk Dûrsûn Demîrtaşî qisey kerd û kesê ke amey dardekerdiş vîrardî.
Demîrtaşî da zonayen ke komkiştena ke serra 1921î de Koçgirî de dest pa kerd, dima ra Palû, Agirî, Zîlan, Dersîm, Mereş, Çorûm, Gazî û Roboskî de dewam kerd. Dûrsûn Demîrtaşî da zonayen ke qirkerdena ’38’î yê Dersim hetê CHP virazîya û va, ‘nika zî hetê AKP qirkerdişî virazîyenê. Mavêna CHP û AKP de ti cîyabîyayişeke çîno.
Mersîn de merasîm
Jew cayo ke merasîmê yadkerdişî virazîya Mersîn bi. Komeleya Dersimijan yê Mersin bana komelî de merasîmeke yadkerdişî viraştî. Merasîm de panqart û dowîzê ke tertele şermezar keno û Seyît Riza vîrano akerdî. Serokê Komelî Hasan Tanrikurtî aşkere kerd ke zihnîyeto ke qirkerdena Dersim viraşt ewro, onca ser kar de yo.
DERSIM / MERSÎN