Împaratoriya Osmaniyan veriya se (100) serr hardê Mezopotamya û Anatoliya de verra şarê ke misilman niyê jû qetlîama gird viraşt. Netîceyê na jenosîdî de 1,5 milyonî Ermeni û 500 hezarî Suryanî qir kerd. Kesê ke pey qirkerdin de ganî mendî vilayê pêrokîn dinya bî. Herzewbîn cayê îbadet û cayê tarixî yê nê şaran zî amey xespkerdin, talankerdin. Heta nika vîst dewletan qetlîama Ermeniyan, çendanê ci zî Seyfo’yê Süryaniyan qebûl kerd. La dewleta tirk hewna zî qetlîam înkar kena û hewl dana binimno. Çi ke na dewleta ke ser zihnîyetê împaratoriya Osmaniyan xo rona bi xo zî verra şaran xeylê qetlîamî viraşt û virazena. Na dewleta gonîwerd hewna hesabê terteleyê Zîlan, yê ’38, yê Mereş, Çorum, Sêwas, yê Roboskî nêdayo. Bi desan hikûmatê ke amey ser hikûmdarî wayrê pêrokîn leyminîn-qilerînê dewlet, wayrê qetlîamanê ci vejyay. Hikûmeta AKP zî goreyê menfaatanê dewleta xo ya qilerîn, goreyê zihnîyetê înkar û qirkerdin polîtîka ramnena. 

AKP fikir, felsefe û siyaseta ke Osmaniyan û Îttihat Terakiyan ramit dewr girot. AKP zî pêrokîn îtiqat, ziwan û şarê ke Mezopotamya û Anatoliya de ciwyenê înkar kena. AKP vana Kurdî, Ermenî, Lazî, Pontusî, Erebî, Çerkezî, Xirîstiyanî, Alewî, Êzidî çinyê, tenya Tirkî û Misilmanî estê.  Serva vûrnayişê na zihnîyeta înkardox, serva heyfgirotiş û serva çarekerdin tenya jû ray esta; a zî jûbiyîna şaran a. Gune pêrokîn kamî û şarê ke Mezopotamya û Anatoliya de ciwyenê çormeyê projeyê ‘neteweya demokratîk’ de bibê jû û quwetê xo bikerê jû. Çi ke wexto ke dewlet û pêrokîn îxtidaran qetlîamî viraştî pêrokîn şaran ardî pê ver, mavêna şaran de nakokey akerdî. Gune çarekerdiş zî bi werte ra hewadayişê nê nakokeyan destpa bikero. Tarix de zî ayseno ke meseleyê Tirkan û Kurdan, yê Ermeniyan, Lazan, Pontusan, yê Elewiyan û Misilmanan, yê Xirîstiyan û Êzidiyan pê ra çinyo. Zihnîyetê netew-dewlet  serva menfaatê îxtidarê xo mavêna şaran akerdiyê û înan şixulnayê. Na polîtîka nika zî ramena. Gune endî pêrokîn şarî cewabê raşt û bi tekoşîna piyayî nê polîtîkayan veng-tol vejerê.

Weçînayişê 7’ê Hezîran’î serva-qandê welişnayişê rejîma ke bi serrano şaran qir kena firsetê do gird o. Gune herkes bi îradeyê xo, bi reyanê xo vajo ma îxtidara ke gonî rijena, şaran, kamiyan, îtiqatan, kiltûr û ziwanan înkar kena nêwazenê. Gune pêrokîn şarê ke hetê rejîmî ameyê înkarkerdin serva akerdişê raya sîstema demokratîk rolê do aktîf kay bikerê. Xora HDP zey meclîsê pêrokîn şaran o. Tirkiye encex şena bi projeyê do wina-niya yî bivûrniyo. Çi ke heta ke Tirkiye demokratîk nêbo, ne meseleya Kurd, ne yê Ermenî, ne yê Alewî, ne yê Ceniyan ne zî meseleyê bînî çare benê. 

Nayî ra gune pêrokîn şarê ke Kurdistan û Tirkiye de ciwyenê serva weçînayişan, serva azadiya şaran, serva vûrnayişê rejîmî seferber bibê. Gune pêrokîn şarî qûwetê xo bikerê jû û AKP ya ke polîtîkayanê qirkerdin de israr kena rê vejê vinde. Gune bîro îspatkerdin ke pêrokîn şarî wazenê pêro piya biciwyê. Nayî ra gune AKP rê dersê do pîl bîro dayen. Hewceyo pêrokîn şarî 7’ê Hezîran’î de bi serkewtişê HDP sîleya pîl riyê AKP ro dê. Gune Şarê ke Seyfo’yê 1915’î de, Zîlan de, Koçgirî de, Dersîm de, Mereş, Çorum, Roboskî de amey qirkerdin 7’ê Hezîran de rejîma qirkerdox ra heyf bigîrê û raya piya ciwyayişê şaran akerê. Zewbîn kes nêşeno garantî bido ke Seyfo û Tertele yê newî nêbê…