Tirkîya de çi heyfo ke hepisxaneyan de telukeyê vilabîyayişê vîrûsî aver şono la îqtîdar hetanî nika tedbîrê cidî nêgirewtê, qanûnê înfazî ke hadre kerd, no qanûn de zî hepsê sîyasî teberê nê qanûnî verada. Cayê Hemşaredara Şaredarîya Şemrexî Nalan Ozaydine ra qeyum ameybî tayînkerdiş û peynî zî Nalane ameybî tewqîfkerdiş.
Rojê hepisxaneyê xo ser o Hemşaredara Şemrexî Nalan Ozaydine Rojnameyê Îstasyonî ra qise kerd. Ozaydine dîyar kerd ke a 18ê adare de şîya nêweşxaneyî, peynî zî rayedarê hepisxaneyî ci ra vatî ke ê nêeşkenî a bigê nêweşxaneyî û wina vat: “Min ra vatî beno ke ti kewta vîrûsî, peynî min tayînê Hepisxaneyê Mêrdînî kerdê la Hepisxaneyê Mêrdînî zî min qebul nêkerd. Peynîya 14 rojê testê min pozîtîf vejîya. Serpirodayişê avukata min ser o zî min tehlîye kerdê.”
Kelmelê pankî çin ê
Ozaydin wina vat: “Min bi wesayîta rîngî ardinê û berdinê nêweşxaneyî. Nika hepisxaneyan de teluke esto ke seyî ra 80î kesê bikê vîrûsî. Ma weş miqate nêbîynê. Tena 2 ray nanê daynê ma. Proses zaf zehmet o, Korona zaf bi lez bila beno. Hepisxaneyî de kelmelê pankî û dezenfekteyî çin ê. Min Hepisxaneyê Tarsusî de nêgirewtê binê karantînaye. Hepisxaneyê Mêrdînî de hedîseyê Koronayî zaf ê, ma odeyê tecrîdî tepiştinê, doktor û hemşerîyê weş xebityaynê.”
Hedîseyî ser o Serdozgerîya Tarsusî aşkera da ke Hepisxaneyê Tarsusî de çew nêkewta/o vîrûsê Koronayî. MERKEZÊ XEBERAN