Siba o tewir yew roj o, êyê ke çerxî yîn hafizaya yîn Mezopotamya û Anatolîya de yê, û qasî merdimahî kahanî, siba serrgera ceverbîyayişî no mîrasî yo. Hef ke siba serrgera ceverbîyayişî yew tarîxî yo zî. Siba serrgera roja êyê ke ganî yewbînan bî, êyê ke kerveyê yewbînan bî, malesef ceverbîyayişî înanî yo. Siba roja ke hezar serrana, êyê verê keyeberî xo de têverê û têhet de bî, la îzdîvacî nayan qedexe bi, roja ebedî ceverbîyayişî Aslika û Cîndî yo. Roja ceverbîyayişî Çolîkîyan û Sitî yo. Siba roja sîya, roja teng, roja lanet, roja komkiştişî yo. Roja sûrgûnbîyayiş û xatirwaştişî di cîranan û di biranan o. Siba rojê şermî merdimahî yo, siba sargerra facîa şaro Armenî yo…
Senî ke haya hemê raya pêro cîhanê pe bî, şar pe zano emserr se serrgera qirqirînî ya. Ayera no hefte, yew hefteyo taybet o. No hefte, hawarê se serran o. No hefte hawarê yew welato vînî bîyaye yo. No hefte, hefte empatî yo. No hefte de her milet, mileta vila bîyayê Armenîyan rê bi empatî yo. O tewir eseno, no hefte zêde zî beno hefte dîplomasî, beno hefte merdimahî û azadî. No hefte beno hefte çalakî û karîgerîyan.
O tewir eseno, no hefte de giranî rojdemî cîhane no felaketî ser o yo. Şaro Armen, teza qirqirîne anî rojdem, wazenê Tirkîya no komkiştişî qebul bikêro. Xo nalet, ozir waştiş, tazmînat dayiş, ê kesê ke merdî(yew mîlyon û nîm) mal û milkî nayan îade wazenê. Şaro Armenî wazeno kulturî xo, kelepurî xo û ziwanî xo no herdo qedîm ser aver berê…
Armenî qabe na roja hesab şaro xo zî konsîlîde kenê. Hedîse 1915 î ajatasyonê şarê cîhanê kenê kî Tirkîya kerdina xo qebul bikêro. Netîce de dora yewîna Papa Francesco qabe no hedîse terefan ra dîyalog waşt. Vat ‘keso bê dîyalog bêîtîatîya homayî keno’. Parlementoya Ewropa(AP) zî goreyê dawaştişî Şaro Armen yew qerar girewt... Dewleta Tirkîya zî, qetîyên teza netewa Armen qebul nêkena. Xo verpersîyar qebul nêkena.Tena wazena nê rojanê giran bi selamet ravîyarnî. Lebetîyeno no atmosfero giran vila bikêre. Tirkîya çaba kena bala raya cîhanê bance Çanakkale, herbî 1918. No sebep ra 24 Nîsanê de caye abîdeya şehîdanê Çanakkale mîyanneteweyî yew komxebat pêk ana.
Tirkîya de Armenî, Asurî û Sûryanî jenosî de, Rum tehcîr û sûrgûn bi. Çerkes, Pomak, Arap, Laz û Kurd hete dewletî ra înkar bi, îmha bi. Bê netewa tirko sipî pêro netew û kêm neteweyê Anatolîya asîmîle bî. Temamî no suco merdimahî tabî ke verpersîyar şar nîyo. Temamî verpersîyar deshelatdar o. Zîhnîyetî Îttîhak Terakî yo. Tek çare zî demokratîkbîyayiş û hevparbîyayiş o. Şar hejayo, fitratî şaro de herb çîn o. La deshelatdar mecbur ê, hesab bido Şar. Şar wazeno felaketî înaneyê tekerur nêkerê.
Mîstefa ŞAHİN