Erdlerzê Xoyî yê Rojhelatê Kurdistanî tesîrê 4 dewanê qezaya Elbakî yê Wanî kerd. Erdlerz de Elbak de 9 kesî merdî, 37 kesî zî birîndar bîyî û rewşa 9ê înan giran a. Qeza de bi seyan bînayî xera bîyî. Hukmatê tirkî ke erdlerzî ra dima bi peygoşîye nêzdîyê karanê xelisnayîşî û hetkarîye bi, verê HDPyî û rêxistinanê komelkîyan ê sivîlan de asteng o ke karê hetkarîye û xelisnayîşî bikerê.
Wekîlê HDPyî yê Wanî Murat Sarisaçî derheqê astengkerdişê kamyonanê înan ê hetkarîye de zanayîşî dayî û qala ci kerd ke çira ê koordînasyonê AFADî tesdîq nêkenê. Sarisaçî pare kerd ke wekîlanê HDPyî, temsîlkaranê DBPyî, HDKyî, KCDyî hemşaredaranê Sêrtî, Elîhî, Patnosî Gîyadînî reyde waşt ke cewab bidê hewcedarîyanê serekan la belê verê înan ame girewtene.Sarisaç wina vat: “Ma şîyî dewanê xo, temamîya înan weçinîtoxê HDPyî yê. Atmosferêko winasên viraşt ke seke ma hetkarîya înan asteng kenê. Armancê înan îzolekerdişê HDPyî û cezakerdişê kurdan o. Şarî rê nê zimistanî de xeymê hamnanî dayî. Wan sey herêma afetî nêame îlankerdene. TOKÎ tîya de do bînayan bivirazo û hemwelatîyan ser o pere qezenç bikero. Têna derdê înan no yo. Bi wesayîtanê zirxînan, konvoyan yenê, fotograf gênê, dîmenî gênê û şinê. No zî metodêkê cezakerdişê kurdan o. Na herême de raya ma zêde ya.’’
ANF/WAN