Hedîseyê kiştişê cinîyan dewam kenê. Bitaybetî emser xeylê cinîyî hetê mêrde, pî, waştî û sewbîna kesan ra kuçe, keye, cayê karî û sewbîna cayan de raştê şîdetî ameyî û no şîdet ge-ge bi kiştişî netîce bi.
Seba ke qatilî cezayêka yena hêvîkerdene nêgênî, şîdetê vera cinîyan de hînî sey rewşêka normale yeno qebulkerdene. Psîkologe Nergîz Eke bale ante raporê derheqê kiştişê cinîyan de ser û dîyar kerd ke ganî no het de tayê gamê pratîkî bêrî eştene. Psîkolog Eke daye zanayene ke xeylê cayanê dinya de no het de xeylê çîyî ameyî kerdene.
Eke dewamê qiseykerdişê xo de wina va: “Hayîya ma tena pê înanê ke ma vînenî yan zî zanenî esta. La êyê ke hayîya ma pê çin a zî estê. Ma zanê ke xeylê cinîyî nêşkenî zaf piştî bigêrê. No şîdet bi temamî nêno qedênayene zî zafê çîyî estî eşkenê bêrê kerdene. Eke ma domanan pîl kenî, ganî ma teqez seyyewbînanîya cinîyan û camêrdan înan rê vajê û na çarçewa de hem pratîk de hem zî cuye de pê nê şîarî tê bigêrê. Piştîdayîşê komelî, têkoşînê vera şîdetê ser cinîyan de zafê gamî ameyî eştene. Bi nê hewayî dinya de zafê cinî û domanî ameyî azadkerdene. Hêvî kena ke têkoşînê xo yê vera sîstemî de ma do gamanê başêrî bierzê”
ANF / STENBOL